[1] యెహోవాను అన్ని వేళలా కీర్తిస్తాను. ఆయన స్తుతి ఎల్లప్పుడూ నాపెదవులపై ఉంటుంది.
[2] యెహోవాలో నా ఆత్మ అతిశయిస్తుంది. దీనదశలో ఉన్నవారు దీనిని విని సంతోషిస్తారు.
[3] నాతో కలిసి యెహోవాకు మహత్తు ఆరోపించండి. ఏక స్వరంతో ఆయన పేరును కీర్తిద్దాం.
[4] నేను యెహోవాను సమీపించి ప్రాధేయపడ్డాను. ఆయన జవాబిచ్చి నా భయాలన్నిటిలోనుంచి నన్ను తప్పించాడు.
[5] వారు ఆయనవైపు చూచి ప్రకాశవంతులయ్యారు. వారి ముఖాలు సిగ్గుతో కుంచించుకుపోవు.
[6] దీనదశలో ఉన్న నేను మొరపెట్టినప్పుడు, యెహోవా ఆలకించి అన్ని ఇక్కట్లలో నుంచి నన్ను గట్టెక్కించాడు.
[7] తన పట్ల భయభక్తులు గల వారి చుట్టూరా యెహోవా దూత ఆవరించి ఉండి వారిని రక్షిస్తాడు.
[8] యెహోవా మంచివాడు. ఆయన మంచితనాన్ని రుచి చూచి తెలుసుకో. ఆయనను నమ్మి ఆశ్రయించిన మనిషి ధన్యజీవి.
[9] యెహోవాకు చెందిన పవిత్రమైనవారలారా, ఆయన పట్ల భయభక్తులతో ఉండండి. ఆయనపట్ల భయభక్తులున్నవారికి కొరత అంటూ ఏదీ ఉండదు.
[10] ఏమీ దొరకక సింహం పిల్లలు ఆకలితో ఉంటాయి. కాని, యెహోవాను వెదకి ప్రాధేయపడేవారికి మంచివాటికి లోటు ఉండదు.
[11] పిల్లలారా, వచ్చి నేను చెప్పేది వినండి. యెహోవా పట్ల భయభక్తులు మీకు నేర్పుతాను.
[12] నీవెవరైనా సరే, బ్రతుకు అంటే ఇష్టం ఉండి, మంచిని చూడడానికి చాలా కాలం బ్రతకాలని కోరితే,
[13] నీ నాలుక చెడుగునుంచి కాపాడుకో. నీ పెదవులు మోసంగా పలకకుండా కాపాడుకో.
[14] చెడుగు నుంచి వైదొలగు. మంచినే చేస్తూ ఉండు. శాంతిని వెదకు. దానిని వేటాడు.
[15] యెహోవా దృష్టి న్యాయవంతుల మీద ఉంది. ఆయన చెవులు వారి మొరలు వింటున్నాయి.
[16] యెహోవా ముఖం చెడుగు చేసేవాళ్ళకు విరోధంగా ఉంది. వాళ్ళను గురించిన జ్ఞాపకం భూమిమీద లేకుండా చేస్తాడాయన.
[17] న్యాయవంతులు మొరపెట్టినప్పుడు యెహోవా ఆలకిస్తాడు. వారిని అన్ని ఇక్కట్లలోనుంచి వారిని గట్టెక్కిస్తాడాయన.
[18] విరిగిన హృదయులకు యెహోవా దగ్గరలో ఉన్నాడు. నలిగిపోయిన మనసు గలవారిని ఆయన రక్షిస్తాడు.
[19] న్యాయవంతులకు ఎన్నో ఆపదలు! కాని, యెహోవా వాటన్నిటిలో నుంచి వారిని తప్పిస్తాడు.
[20] అతని ఎముకలన్నిటికి కూడా ఆయన వల్ల క్షేమం! వాటిలో ఒకటైనా విరగదు.
[21] చెడుగు దుర్మార్గులను సంహరిస్తుంది. న్యాయవంతులంటే గిట్టనివాళ్ళకు నాశనం తప్పదు.
[22] యెహోవా తన దాసులను విడుదల చేస్తాడు. ఆయనను నమ్మి ఆశ్రయించినవారిలో ఎవరికీ నాశనం అంటూ ఉండదు.