<కీర్తనలు 3

[1] యెహోవా, నాకు విరోధులెందరో ఉన్నారు! నాకు వ్యతిరేకంగా నిలబడేవాళ్ళెందరో!

[2] “దేవుని మూలంగా అతడికేమీ రక్షణ దొరకదు” అంటూ అనేక మంది నా గురించి అంటున్నారు. (సెలా)

[3] కాని, యెహోవా! నీవు నాకు డాలులాంటివాడవు. నీవే నాకు ఘనత. నేను తలెత్తుకొనేలా చేసేవాడవు నీవే.

[4] నేను గొంతెత్తి యెహోవాకు మొర పెట్టేటప్పుడు ఆయన తన పవిత్ర పర్వతం నుంచి జవాబిస్తాడు. (సెలా)

[5] యెహోవా నాకు అండగా ఉండడం చేత నేను పడుకొన్నాను, నిద్రపోయి లేచాను.

[6] వేలాది వేలమంది శత్రువులు వచ్చి నన్ను చుట్టుముట్టారు గానీ నాకేమీ భయం లేదు.

[7] యెహోవా, లే! నా దేవా! నన్ను రక్షించు. నీవు నా శత్రువులందరి దవడ ఎముక విరగకొట్టేవాడవు. దుర్మార్గుల పళ్ళు రాలగొట్టేవాడవు.

[8] రక్షించేది యెహోవాయే, నీ ప్రజమీద నీ ఆశీస్సులు ఉంటాయి గాక! (సెలా)