[1] యెహోవా, దావీదునూ అతడి కడగండ్లన్నీ జ్ఞాపకముంచుకో.
[2] అతడు యెహోవాకు ప్రమాణం చేశాడు, యాకోబు యొక్క పరాక్రమశాలి అయిన దేవునికి మొక్కుబడి చేశాడు:
[3] “యెహోవాకు నేను స్థలం చూచేవరకూ యాకోబు యొక్క పరాక్రమశాలి అయిన దేవునికి నివాసం చూచేవరకూ
[4] నేను కాపురమున్న డేరాలో ప్రవేశించను, నా మంచంమీద పడుకోను,
[5] నా కండ్లకు నిద్ర రానియ్యను, నా కను రెప్పలకు కునికిపాట్లు రానియ్యను.”
[6] ఎఫ్రాతాలో విన్నాం. అడవి మైదానంలో అది మనకు దొరికింది.
[7] యెహోవా నివసించే చోటికి వెళ్దాం రండి. ఆయన పాదపీఠం ముందు సాష్టాంగపడుదాం రండి.
[8] యెహోవా, లే! నీ బలానికి సూచకమైన పెట్టెతో నీ విశ్రాంతి స్థానంలో ప్రవేశించు.
[9] నీ యాజులు న్యాయాన్ని వస్త్రంలాగా ధరించుకొంటారు గాక! నీ భక్తులు ఆనంద ధ్వనులు చేస్తారు గాక!
[10] నీ సేవకుడైన దావీదు కోసం నీ అభిషిక్తుణ్ణి నిరాకరించకు.
[11] యెహోవా దావీదుకు నమ్మకమైన ప్రమాణం చేశాడు. ఆయన ఆ మాట తప్పడు. ఏమిటంటే, “నీ సంతానాన్ని నీ సింహాసనం ఎక్కిస్తాను.
[12] నీ కొడుకులు నా ఒడంబడిక పాటిస్తే, నేను వారికి నేర్పే శాసనాలు ఆచరిస్తే, వారి కొడుకులు కూడా ఎప్పటికీ నీ సింహాసనమెక్కుతారు.”
[13] ఎందుకంటే, యెహోవా సీయోనును ఎన్నుకొన్నాడు, దానిని తన నివాసంగా కోరుకొన్నాడు.
[14] “ఇది నేను కోరుకొన్న స్థలం. కనుక ఇది ఎప్పటికీ నా విశ్రాంతి స్థానంగా ఉంటుంది. నేనిక్కడ ఉంటాను.
[15] దానికి ఆశీస్సులు ప్రసాదిస్తూ సమృద్ధిగా ఆహారం లభించేలా చూస్తాను. అందులోని పేదసాదలు తృప్తిగా తినేలా చేస్తాను.
[16] దాని యాజులు విముక్తిని వస్త్రంగా ధరించేలా చేస్తాను. దాని భక్తులు బిగ్గరగా ఆనందధ్వనులు చేస్తారు.
[17] అక్కడే దావీదు వంశానికి శృంగం పైకి వచ్చేలా చేస్తాను. అక్కడే నా అభిషిక్తుని కోసం నేను ఒక దీపం సిద్ధం చేసి ఉంచాను.
[18] ఆయన శత్రువులకు అవమానమే వస్త్రంగా ధరింపజేస్తాను. ఆయన కిరీటం ఆయన మీదే ఉండి ప్రకాశిస్తుంది” అన్నాడు.