<కీర్తనలు 126

[1] యెహోవా సీయోను నగరవాసులను చెరనుంచి తిరిగి తెచ్చినప్పుడు మనం కల కంటున్నామా అనిపించింది.

[2] మన నోరు నవ్వులతో నిండిపోయింది. మన నాలుక ఆనంద ధ్వనులు చేసింది. అప్పుడు ఇతర జనాలు ఇలా చెప్పుకొన్నారు: “యెహోవా వీళ్ళకోసం గొప్ప క్రియలు చేశాడు.”

[3] నిజంగా యెహోవా మనకోసం గొప్ప క్రియలు చేశాడు. మనం ఆనందభరితులం.

[4] దక్షిణ ప్రదేశాల ప్రవాహాలు పారినట్లు, యెహోవా, మమ్మల్ని చెరనుంచి తిరిగి రప్పించు.

[5] కన్నీళ్ళు విడుస్తూ విత్తనాలు చల్లేవారు ఆనంద ధ్వనులు చేస్తూ పంట కోస్తారు.

[6] విత్తనాలు చేతపట్టుకొని ఏడుస్తూ అటూ ఇటూ వెళ్తూ ఉండేవాడు ఆనంద ధ్వనులతో వచ్చితీరుతాడు. తన పనలను మోసుకొని తిరిగి వస్తాడు.