[1] యెహోవాకు కృతజ్ఞత అర్పించండి. ఆయన పేర ప్రార్థన చేయండి. ఆయన క్రియలను జనాలకు తెలపండి.
[2] ఆయనను ఉద్దేశించి పాటలు పాడండి, స్తుతి గీతాలు చేయండి. ఆయన చేసే అద్భుతాలన్నిటిని గురించి కబుర్లాడుకోండి.
[3] ఆయన పవిత్రమైన పేర అతిశయించండి. యెహోవాను వెదికేవారి హృదయం ఆనందిస్తుంది.
[4] యెహోవాను, ఆయన బలాన్ని వెదకండి. ఆయన ముఖ సందర్శనాన్ని ఎప్పటికీ వెదకండి.
[5] ఆయన సేవకుడైన అబ్రాహాము వంశమా! ఆయన ఎన్నుకొన్న యాకోబు సంతానమా!
[6] ఆయన చేసిన అద్భుతాలను జ్ఞాపకం ఉంచుకోండి. ఆయన చేసిన ఆశ్చర్యకరమైన క్రియలు, ఆయన నోటినుంచి వెలువడే న్యాయ నిర్ణయాలు జ్ఞాపకం చేసుకోండి.
[7] ఆయన మన దేవుడైన యెహోవా. ఆయన తీర్పులు లోకంలో అంతటా జరుగుతున్నాయి.
[8] తాను చెప్పిన మాట వెయ్యి తరాలు ఆయన జ్ఞాపకం ఉంచుకుంటాడు.
[9] ఇస్సాకుకు ఆయన చేసిన ప్రమాణం, ఆయన ఎప్పటికీ జ్ఞాపకం ఉంచుకుంటాడు.
[10] ఆయన దానిని యాకోబుకు చట్టంగా స్థిరపరచాడు. ఇస్రాయేల్‌కు శాశ్వతమైన ఒప్పందంగా సుస్థిరం చేశాడు.
[11] ఆయన మాట ఇచ్చాడు – “కనానుదేశం మీకు వారసత్వంగా ఇస్తాను. అది మీ భాగం”.
[12] అప్పుడు వారిని సులభంగా లెక్క పెట్టవచ్చు. ఆ కొద్దిమంది ఆ దేశంలో పరాయివారుగా ఉన్నారు.
[13] దేశంనుంచి దేశానికి తిరుగాడారు వారు. ఒక రాజ్యంనుంచి ఇంకో రాజ్యానికి తిరిగారు.
[14] యెహోవా “నేను అభిషేకించిన వారిని మీరు ముట్టకూడదు. నా ప్రవక్తలకు హాని చెయ్యకూడదు” అంటూ
[15] ఎవరినీ వారికి హాని చెయ్యనియ్యలేదు. వారి పక్షాన రాజులను ఆయన హెచ్చరించాడు.
[16] కనాను దేశానికి కరవు వచ్చేలా చేశాడాయన. జీవనాధారమైన ఆహారం దొరకకుండా చేశాడు.
[17] వారికి ముందుగా ఆయన యోసేపును పంపాడు. వారు అతణ్ణి బానిసగా అమ్మివేశారు.
[18] అతని కాళ్లకు సంకెళ్ళు వేసి బాధించారు. ఇనుప గొలుసులతో అతణ్ణి బాధించారు.
[19] అతని మాట నెరవేరేవరకూ యెహోవా వాక్కు అతణ్ణి పరీక్షించింది.
[20] తరువాత రాజు కబురు పెట్టి, అతణ్ణి చెరసాలలో నుంచి విడిపించాడు. జనాల పాలకుడు అతణ్ణి విడుదల చేశాడు.
[21] తన సామంతులను యోసేపు ఇష్టప్రకారం కట్టుబాటులో ఉంచడానికీ, తన పెద్దలకు జ్ఞానం కలిగించడానికీ
[22] తన ఇంటి మీద అతణ్ణి అధిపతిగా నియమించాడు. తన ఆస్తి అంతటిమీదా అతనికి యాజమాన్యం అప్పగించాడు.
[23] తరువాత ఇస్రాయేల్‌ఈజిప్ట్‌కు వచ్చాడు. హాము దేశంలో యాకోబు ప్రవాసం చేశాడు.
[24] యెహోవా తన ప్రజలకు అధిక సంతానాన్ని కలిగించాడు. శత్రువులకు మించిన బలం వారికి ఇచ్చాడు.
[25] అక్కడివారు తన ప్రజలను ద్వేషించేలా, తన సేవకుల పట్ల కపటంతో వ్యవహరించేలా వారి హృదయాలలో పని చేశాడు.
[26] ఆయన తన సేవకుడైన మోషేను పంపాడు. తాను ఎన్నుకొన్న అహరోనును పంపాడు.
[27] వారు వాళ్ళ మధ్య దేవుని ఆశ్చర్యకరమైన క్రియలు జరిగించారు. ఆ హాము దేశంలో అద్భుతాలు చేశారు.
[28] యెహోవా చీకటిని పంపాడు. చీకటి అంతటా ఆవరించేలా చేశాడు. వాళ్ళు ఆయన మాటకు ఎదురాడలేదా?
[29] వాళ్ళ నీళ్ళను నెత్తురుగా మార్చాడు. వాళ్ళ చేపలను ఈ విధంగా చంపాడు.
[30] వాళ్ళ దేశం కప్పలతో నిండిపోయింది. పరిపాలకుల ఇండ్లలోని గదులు కూడా వాటితో నిండిపోయాయి.
[31] ఆయన ఆజ్ఞ మేరకు జోరీగలు వచ్చాయి. వాళ్ళ దేశమంతటా దోమలు ముసురుకొన్నాయి.
[32] వాళ్ళ మీదికి వడగండ్ల వాన పంపాడాయన. వాళ్ళ దేశంలో మంటలు పుట్టించాడు.
[33] వాళ్ళ ద్రాక్షచెట్లూ, అంజూరు వృక్షాలూ పడగొట్టాడాయన. వాళ్ళ సరిహద్దులలో ఉన్నచెట్లను విరగ్గొట్టాడు.
[34] ఆయన ఆజ్ఞ ఇస్తే ఎగిరే మిడతలు వచ్చి పడ్డాయి. లెక్కలేనంతగా గొల్లభామ పురుగులు వచ్చాయి.
[35] వాళ్ళ దేశంలో పచ్చని మొక్కలన్నిటినీ అవి తినివేశాయి. వాళ్ళ పంట చేలను పొట్టన పెట్టుకొన్నాయి.
[36] వాళ్ళ దేశంలో మొదట పుట్టిన కొడుకులందరినీ ఆయన హతమార్చాడు. వాళ్ళ బలంవల్ల కలిగిన ఆ తొలి సంతానాన్ని ఆయన చంపాడు.
[37] ఆయన ఇస్రాయేల్‌వారిని బయటికి రప్పించాడు. వారు వెండి బంగారాలు తెచ్చారు. ఆయన గోత్రాలలో తొట్రుపడేవారెవరూ లేరు.
[38] వారంటే ఈజిప్ట్‌వాళ్ళకు భయం పట్టుకొంది. వారు వెళ్ళిపోతూ ఉంటే వీళ్ళు సంతోష పడ్డారు.
[39] వాళ్ళను కప్పడానికి తెరలాగా మేఘాన్ని పరిచాడాయన. రాత్రిలో వెలుగుకోసం మంటలను దయచేశాడు.
[40] వారు కోరుకొన్నట్టే ఆయన పూరేడు పిట్టలను రప్పించాడు. ఆకాశం నుంచి వచ్చే ఆహారంతో వారిని తృప్తి పరిచాడు.
[41] ఆయన బండను చీల్చాడు. అందులో నుంచి నీళ్ళు ఉబికి వచ్చాయి. ఆ నీరు నదిలాగా ఎడారి స్థలాలలో పారింది.
[42] ఆయన తన పవిత్ర వాక్కునూ, తన సేవకుడైన అబ్రాహామునూ జ్ఞాపకం ఉంచుకొన్నాడు.
[43] ఆయన తన ప్రజలను సంతోషంతో బయటికి తీసుకువచ్చాడు. తాను ఎన్నుకొన్న ప్రజలను ఆనంద ధ్వనులతో రప్పించాడు.
[44] ఇతర ప్రజల భూములను ఆయన వీరికిచ్చాడు. వాళ్ళ కష్టార్జితం వీరు స్వాధీనం చేసుకొన్నారు.
[45] తద్వారా వారు తన చట్టాలను పాటించాలనీ, తన ఉపదేశాలను ఆచరణలో పెట్టాలనీ ఆయన ఇదంతా చేశాడు. యెహోవాను స్తుతించండి!