[1] Yaa Waaqayyo, gurra kee gara kadhata kootti qabi, himata koo jalaas hin didin!
[2] Ati ana dhaggeeffadhu, anaaf deebisis! Dhibeen koo na joorsee nagaa na dhowweera.
[3] Diinonni anatti in iyyu, namoonni jal'oonni gad na qabu, isaan badiisa na irratti in fidu, aarii isaaniitiinis diina anatti in ta'u.
[4] Keessa kootti lapheen koo in sirba; naasuun du'aas ana irratti lafa in dha'e.
[5] Sodaanii fi rom'i na qabatan, pherpheramnis guutummaatti na raase.
[6] Utuu ani akka gugee baallee qabaadhee, balali'ee iddoo tokko nan boqodhan ture.
[7] Silaa illee jalaa baqadhee achis fagaadhee, lafa namni hin jirre nan bubbulan ture.
[8] Qilleensa jabaadhaa fi bubbee jalaas, gara iddoo baqannaa kootti nan ariifadhan ture.
[9] Akka isaan wal hin hubanne godhi, afaan isaaniis gargar baasi, yaa gooftaa! Humnaan wal irratti ka'uu fi qoccolloo, mandarattii keessatti argeera.
[10] Halkanii fi guyyaas masaraa ishee irra in naanna'u, hamminni, jal'innis mandarattii keessa jira;
[11] keessa ishee badiisatu jira, gabaa ishee keessaas nama gad qabuunii fi gowwoomsuun hin mittiqu.
[12] Diinatu ana arrabsa utuu ta'ee, nan baadhan ture; isa na jibbutu anatti of gurguddisa utuu ta'ee, isa duraa nan sokkan ture.
[13] Amma garuu situ kana godhe, si isa hiriyaa kootii, nama garaa kootii, nama ani ba'eessa godhee beekus,
[14] si isa haasaan keenya walitti miyaa'e, isa wajjin tuuta gidduu buunee gara mana Waaqayyoo dhaqne.
[15] Hamminni garaa isaanii fi mana isaanii keessa waan guuteef, isaan utuu itti hin yaadin du'i itti haa dhufu! Jiraatti gara iddoo lafa jalaatti gad haa bu'an!
[16] Ani garuu Waaqayyoon nan waammadha, gooftichis ana in oolcha;
[17] galgalaa fi ganama, waareettis, isatti nan himadha, isatti nan boo'as, innis sagalee koo in dhaga'a.
[18] Warri ana irratti ka'an waan baay'ataniif, lola anatti ka'e keessaa lubbuu koo nagaatti galchi!
[19] Waaqayyo inni durii durii jalqabee teessoo isaa irra jiru, kana in dhaga'a; sababii isaan yaada garaa isaanii geddarachuu didanii, isas sodaachuu dhiisaniif, gad isaan in deebisa.
[20] Inni hiriyaa koo ture sun, warra isaa wajjin nagaatti jiraatan irratti harka ol fudhate, kakuu isaas in cabse.
[21] Haasaan afaan isaatii akkuma dhadhaa ti, nama hin quuqu, garaa isaa keessa immoo lolatu jira; dubbiin isaas dibata caalaa in laafa, garuu akka billaa luqqifamee jiruu ti.
[22] Wanta yaada sitti ta'u Waaqayyotti gatii dhiisi, inni akka ati hin kufnetti si irkisa! Namni qajeelaan raawwatee akka hin mittiqne in godha.
[23] Warri dhiiga namaa dhangalaasanii fi, warri haxxummaadhaan nama gowwoomsan garuu, boolla gad fagootti akka gad bu'an in goota; yaa Waaqayyo! Isaan bara jireenya isaanii hin walakkeessan; ani garuu sin amanadha.