[1] Waaqayyoon jajadhaa! Bantiiwwan waaqaa keessaa Waaqayyoon jajadhaa, ol gubbaa sanatti isa jajadhaa!
[2] Ergamoonni isaa warri waaqa irraa hundinuu isa jajadhaa; macci isaa hundinuus isa jajadhaa!
[3] Biiftuu fi ji'i isa jajadhaa, urjoonni calaqqiftanis isa jajadhaa!
[4] Bantiiwwan waaqaa warri ol fagoon, isinis bishaanonni bantiiwwan waaqaa irra jirtan, isa jajadhaa!
[5] Inni abboomnaan waan uumamaniif, isaan maqaa Waaqayyoo haa jajatan!
[6] Inni yeroo hundumaaf baruma baraan cimsee isaan dhaabe, seerrata isaan irra darbuu hin dandeenyes isaaniif in kenne.
[7] Isin bineensonni akka jawwee galaanatti galtan, tuujjubni galaanaas, lafaa Waaqayyoon jajadhaa!
[8] Isin ibiddii fi qorri, cabbiinii fi hurriin, bubbeen qilleensaa inni abboommii isaa raawwatu,
[9] Tulloonni gaaronnis hundinuu, mukeetiin ija godhatan, gaatiraanis hundinuu,
[10] bineensonni, horiin qe'ees hundinuu, warri lafa irra munyuuqan, warri baalleedhaan ka'anis,
[11] mootonni lafaa, sabnis hundinuu, gurguddoonni, warri biyya seerratanis hundinuu,
[12] dargaggoonni, durboonnis akkasuma, jaarsoliinis ijoollee wajjin,
[13] hundumti isaanii maqaa Waaqayyoo haa jajatan! Maqaan isaa kophaan ol ka'ee waan beekameef, surraan isaa lafaa fi bantii waaqaa gara irraa dha.
[14] Jajuu ijoollee Israa'el, warra isatti dhi'aatanii, isaaf of kennan hundumaaf, inni gaanfa mataa saba isaa ol qabeera. Waaqayyoon jajadhaa!