<Zebûr 60

[1] Xwedê, Te em ji ber Xwe avîtin, Tu li me hêrs k'etî, em qudûm xistin, de berê Xwe li meda ke!

[2] Te e'rd h'ejand û tîş lê xist, qeliştokêd wê bicebirîne, çimkî ew dilerize.

[3] Te tengasî da cime'ta Xwe, şerava deminandinê em dane vexwarinê.

[4] Te xofk'êşêd Xwer'a al da bilindkirin, nîşanek da ku ji tîra bir'evin, (Sela)

[5] bi destê Xweyî r'astê me ser xe û bibihê, wekî h'izkirîyêd Te azad bin.

[6] Xwedê ji Cîyê Xweyî Pîroz xeber da: «Ezê şa bim, Şexemê p'arevekim newala Sûkotê bipîvim.

[7] Gîle'd ya Min e, Minaşe ya Min e, Efrayîm zirih'ê serê Min e, Cihûda jî qanûndarê Min e.

[8] Mowab derdana Mine şûştinê ye, sola Xwe Ezê bavêjime ser Edomê, dilê Xwe Ezê şa kim li Filistînê».

[9] K'î wê min bibe bajarê sûrkirî? K'î wê r'êberîya min bike h'eta Edomê?

[10] Tu nînî Xwedê, ku Te em ji ber Xwe avîtin? Tu t'evî ordîyêd me dernak'evî, Xwedêyo!

[11] Ji destê neyar me xilaz ke, çimkî p'ûç' e alîk'arîya meriva.

[12] Emê pê Xwedê mêrxasîyê bikin, t'enê Ewê dijminêd me p'êpes ke.