<Zebûr 118

[1] Şikirîyê bidine Xudan, Ew qenc e û h'uba Wî h'eta-h'etayê ye!

[2] De bira Îsraêl bêje: «H'uba Wî h'eta-h'etayê ye».

[3] De bira mala Harûn bêje: «H'uba Wî h'eta-h'etayê ye».

[4] De bira xudanxof bêjin: «H'uba Wî h'eta-h'etayê ye».

[5] Tengasîyêda min gazî Xudan kir, Xudan cab da, ez derxistime fireyê.

[6] Xudan t'evî min e, ez natirsim, însanê çi li min bike?

[7] Xudan k'omekdarê min e, ezê axirîya neyarêd xwe bibînim.

[8] Ya p'ak e Xudanda guman bin, ne ku xwe bispêrine benda.

[9] Ya p'ak e Xudanda guman bin, ne ku xwe bispêrine mîr û bega.

[10] H'emû mileta ser minda girtin, lê bi navê Xudan ez wan hûrdexweşî dikim.

[11] Her alîyava dora min girtin, lê bi navê Xudan ez wan hûrdexweşî dikim.

[12] Mîna moza dora min girtin, lê mîna agirê stirîya ew tefîyan, bi navê Xudan ez wan hûrdexweşî dikim.

[13] Ez qewîn de'f dam ku bik'evim, lê Xudan alî min kir.

[14] Xudan qewat û qudreta min e, Ew bona min xilazkir e.

[15] Dengê şabûn û serk'etinê ji konêd r'asta tê: «Destê Xudanî r'astê qewatê dike.

[16] Destê Xudanî r'astê bilindkirî ye, destê Xudanî r'astê qewatê dike».

[17] Ez namirim, ezê bijîm, kirinêd Xudan ezê salix kim.

[18] Xudan gelekî serê min kir, lê ez nedame destê mirinê.

[19] Dergehêd r'astîyê minr'a vekin, ku bik'evime nav wan û şikirîyê bidime Xudan.

[20] Eva dergehê Xudan e, r'astê wirr'a bik'evinê.

[21] Şikir ji Ter'a, Te dengê min bihîst û minr'a bûyî xilazkir.

[22] Ew kevirê ku hosta t'exsîr kir, ew bû serê e'nîşkê.

[23] Ev yek ji alîyê Xudanda qewimî û li ber ç'e'vê me h'eyr-h'ujmek'ar e!

[24] Eva r'oja Xudan xuliqand, werin em vêda eşq û şa bin.

[25] Hewar Xudan, me xilaz ke! Hewar Xudan, mer'a li hev bîne.

[26] Bimbarek e ewê ku bi navê Xudan tê! Em ji Xana Xudan we bimbarek-pîroz dikin .

[27] Xudan e Xwedê, Wî em r'onayî kirin. Pê bena qurbana cejinê girêdin, h'eta stirûyê gorîgehê bibin.

[28] Tu yî Xwedêyê min, ezê şikirîyê bidime Te, Tu yî Xwedêyê min, ezê Te bilind kim.

[29] Şikirîyê bidine Xudan, Ew qenc e û h'uba Wî h'eta-h'etayê ye! ALÊF