[1] Веза Эла, Хьо – бекхам беш волу Эла ву, лепаш дӀахӀоттахьа, бекхам беш волу Дела!
[2] ГӀаттахьа, дуьненан Кхелахо, курачарна бекхам бехьа.
[3] Мел дахлур ду те Ӏесачеран сакъерадалар? Мел дахлур ду те уьш баккхийбер?
[4] Цара шайн кура хабарш дуьйцу. Массо а зуламхой дозаллех буьзна бу.
[5] Хьан халкъана, Веза Эла, гӀело йо цара, Хьан долахь берш цара бацабо.
[6] Цара бисина Ӏаш болу зударий боха а бо, тӀебаьхкина нах а, бай а хӀаллак а до.
[7] Цара боху: «Везачу Элана хӀара ца го, Якъубан Дала хӀокхуьнан тидам ца бо».
[8] Хьекъале дуьйлийша, нахана юкъара кхетам боцурш! Маца кхетар ду теша шу, хьекъал доцурш?
[9] Шуна лергаш Деллачунна дӀахезар дац ткъа? Шуна бӀаьргаш Деллачунна дӀагур дац ткъа?
[10] Халкъашна таӀзар Дечо шу нисдийр дац ткъа? Адамаш Ӏамош Волчун хьекъал ца кхочу ткъа?
[11] Везачу Элана адаман ойланаш евза, Цунна хууш ду и ойланаш эрна юйла.
[12] Декъала ву, Веза Эла, Ахьа хьехар деш верг, Хьан товрат-хьехамаш Хьоьгара Ӏамош верг.
[13] Бохаман деношкахь Ахьа цунна синтем ло, Ӏесачарна каш аьхкина даллалц.
[14] Везачу Эло Шен халкъ дӀатоттур дац, Цо Шен долахь берш цкъа а буьтур бац.
[15] Кхел ечу меттигашка нийсо юхайоьрзур ю, ткъа догцӀена мел берш цунна тӀаьхьахӀуьттур бу.
[16] Мила ваьлла сан дуьхьа зуламечу нахана дуьхьал? Мила хилла соьца харцонаш лелош болчарна дуьхьал?
[17] Везачу Эло суна гӀо ца динехь, кестта сан са эхартан тийналлехь хир дара.
[18] «Сан ког шерша», – аьлла, суна хетачу хенахь, Хьан безамах, Веза Эла, суна гӀортор хилира.
[19] Кийрахь со гӀайгӀане волчу хенахь, Ахьа бинчу синхьаамо сан дог синтеме далийра.
[20] Хьоьца цхьаьнакхетар ма бац телхина кхелахой, нахана бохам баккха Ӏедал дерзораш.
[21] Уьш цхьаьна а кхетий, нийса лелачарна дуьхьалбовлу, цара бехк боцучунна вайаран кхел кхайкхайо.
[22] Амма Веза Эла сан гӀап хилла дӀахӀоьттина, сан Дела суна къайлаваккхаран тарх хилла.
[23] Цара лелийначу зуламех Цо бекхам бийр бу, цара динчу вонна Цо уьш хӀаллак а бийр бу. Вайн Везачу Дала уьш хӀаллакбийр ма бу!