[1] Эшарш локхучу тобанан куьйгалхочуьнга: «Шушаним» олучу мукъамехь ала езаш ю. Кхорахьан тӀаьхьенан йолу хьехаме назма. Безаман йиш.
[2] Сан дага чуьра хаза дешнаш арадуьйлу, сайн аяташ аса паччахьна лерина доху, сан мотт говзачу йозанчин къолам бу.
[3] Адамашна юкъара уггар исбаьхьаниг ву хьо. Къамел дарна говза а ву хьо, цундела Дала абаденналц декъалвина хьо.
[4] ГӀодаюкъах дехка, ва турпалхо, хьайн тур, хьайн паччахьан сий а, исбаьхьалла а долу.
[5] Хьайн хазаллица говр хахкахьа, толам а боккхуш, билггал бакъдолчун а, кӀедачу нийсонан а дуьхьа, хьан аьтту куьйго хьуна инзаре хӀуманаш гайтийтархьама.
[6] Хьан ира пхерчий паччахьан мостагӀийн дегнех чекхдовлийла. Хьан когашна хьалха халкъаш охьаэгийла.
[7] Дала делла хьан паччахьалла абаденналц лаьтта, ткъа хьан паччахьалла нийсонан паччахьалла ду.
[8] Нийсо а езаш, харцо ца еза хьуна, цундела Дала къобалвина хьо, хьан Дала хьан накъосташна чул а хьуна алссам хазахетар делла.
[9] Хаза хьожа йогӀу деза даьтта а, сарап а, кассия а хьан ерриг а тӀеюхучу бедаршна тӀехь ю. Пийлан кӀомсарех хаздинчу паччахьан цӀеношна тӀера мерз-пондарийн мукъамаша хьан самукъадоккху.
[10] Хьан долахь болу паччахьийн йоӀарий лараме болчу зударшна юкъахь бу хьан. Апар-махкара шена тӀехь деши а долуш, нускал ду хьуна аьтту агӀор дӀахӀоьттина.
[11] ЛадогӀалахь, йоӀ, схьахьажалахь, хьайн лерг а схьадерзаделахь, хьайн халкъ а дицделахь, хьайн ден цӀа а дицделахь.
[12] Паччахьна хьан хазалла езалур ю. Иза хьан олахо волу дела, хьо Цунна хьалха охьатаӀалахь.
[13] Цора-гӀалара бахархоша совгӀаташ дахьар ду, къоман хьалдолчара хьо шайна резахилар лоьхур ду.
[14] Паччахьан нускал паччахьан цӀа чу доьду. Ма хаза ду иза! Цуьнан духар дешица кечдина ду
[15] Тир яьккхина духар тӀехь а долуш, иза паччахьна хьалха юьгу. Нускална юххебовлу йоӀарий а цунна тӀе балабо.
[16] Самукъадаларца а, баккхийберца а паччахьан цӀа чу бовлу уьш.
[17] Хьан дайн метта хьан кӀентий дӀахӀуьттур бу, ва паччахь. Дерриг а лаьтта тӀехь, элий а бина, дӀахӀиттор бу ахьа уьш.
[18] Массо а тӀейогӀучу тӀаьхьенашкахь хьан цӀе аса дагаоьхуьйтур ю. Цундела халкъаша абаденналц хьан сий дийр ду.