[1] Хастам бу Везачу Элана! Сан са, хаставе Веза Эла.
[2] Со мел веха, Везачу Элана иллеш эр ду ас, иштта сайн Далла хастамаш беш а хир ву со, айса хан мел йоккху.
[3] Элех теший ма Ӏелаш, адамах бӀобулий ма хилалаш, хьо кӀелхьарваккха йиш ма яц церан.
[4] Шена чуьра са дӀадаьлча, стаг лаьтте воьрзу. Цу дийнахь цуьнан дог-ойланаш а дӀайовлу.
[5] Ирс долуш ву шен гӀоьнча Якъубан Дела верг, шен Везачу Делах бӀобулуш верг.
[6] Цу Дала кхоьллина стигал а, латта а, хӀорд а, царна чохь мел дерг а. Цо гуттар а ларбо тешам,
[7] халахетар хиллачарна гӀо до, мецачарна кхача ло. Везачу Эло тутмакхаш мукъабоху,
[8] Везачу Эло бӀаьрзечарна са гойту, Везачу Эло дахаран халонаша охьатаӀийнарш дӀанисбо, Везачу Элана Делан лаамехь берш беза.
[9] Везачу Эло тӀебаьхкина нах Ӏалашбо, буона а, йисна Ӏачунна а гӀо до, харцо лелош болчеран некъ бухахьабоккху.
[10] Веза Эла гуттар а паччахьалла деш хир ву, хьан Дела, ва Цийон, тӀаьхьенашкара тӀаьхьенашкахь Паччахь хир ву. Везачу Элана хастам бе.