[1] Даудан назма. Декъала ву Веза Эла, Иза сан тарх ю. Цо тӀамана кечвина со, сан куьйгаш лата Ӏамийна.
[2] Суна тешаме Верг, сан ГӀап, сан къайлаволу Меттиг, со КӀелхьарвоккхург, сан турс – сан Цунах дегайовхо ю. Цо сан куьйга кӀел даладо сан халкъ.
[3] Веза Эла! Мила ву стаг, Ахь цуьнан гӀайгӀа бан, адамийн кӀант тергал хӀунда во Ахьа?
[4] Адам хьоькхучу махах тера ду, цуьнан дахар а дацлуш долу ӀиндагӀ ду.
[5] Веза Эла! Хьайн стигалш дӀаса а таттий, чувоссахьа. Лаьмнех хьакхалохьа, тӀаккха цара кӀур тосур бу.
[6] Стелахаьштиг тохий, мостагӀий дӀасакхиссахьа, Хьайн пхерчий а тохий, лахкахьа уьш.
[7] Лакхара Хьайн куьг а кховдадай, буьрсачу хих а, хийрачу махкара болчу нехан карара а кӀелхьарваккхахьа со.
[8] Церан баганаша даьссаниг дуьйцу, стаг Ӏехош ду церан куьйгаш.
[9] Дела! Итт мерз болчу пондар тӀехь керла йиш локхур ю ас Хьуна,
[10] паччахьашна толам лучу Хьуна, Хьайн лай Дауд дерачу туьрах кӀелхьарвоккхучу Хьуна.
[11] Хийрачу махкара болчу нехан карара кӀелхьарваккхахьа со. Церан баганаша даьссаниг дуьйцу, стаг Ӏехош ду церан куьйгаш.
[12] Ондачу диттех тера хуьлда вайн кӀентий, паччахьан цӀа чохь кечдинчу бӀогӀамех тера хуьлда вайн мехкарий.
[13] Ялта Ӏалашдеш йолу чоьнаш мел долчу беркатах юьзна хуьлда вайн, дежийлашкахь эзарнаш уьстагӀий дебийла вайн.
[14] Хьийкъина хуьлда вайн стерчий. Тхуна тӀелатар ма хуьлда, цхьа а йийсаре а ма вуьгийла. Вайн урамашкахь белхар ма хуьлда.
[15] Ирс долуш ду и дерриг а долу халкъ. Ирс долуш ду Веза Эла Дела волу халкъ.