[1] Делан цӀа даздан олу Даудан назма.
[2] Веза Эла, ас хастам бо Хьуна. Ахь кӀелхьарваьккхи со, сан мостагӀий сох ца белийти.
[3] Сан Веза Дела! Ас гӀо дийхира Хьоьга, Ахь суна дарба дира.
[4] Эхартара сан са ара а даьккхина, со денвира Ахь, Веза Эла, коша чу со ца вижийтира.
[5] Хастам бе Везачу Элана, Цунна тешаме болу нах. Иза веза хилар дагадоуьйтуш, хаставе аша Иза,
[6] хӀунда аьлча кӀеззигчу ханна ду Цуьнан оьгӀазвахар, дерриг а дахарна ду Цуьнан дика. Суьйранна белхар дӀахӀоттахь а, Ӏуьйранна самукъадалар хуьлу.
[7] Со синтеме волуш ас бехира: «Цхьана а хӀумано меттахвоккхур вац со».
[8] Хьайн диканца, Веза Эла, Ахь чӀагӀбира сан лам. Амма Ахь Хьайн юьхь къайлаяьккхича, со вуьйхира.
[9] ТӀаккха, Веза Эла, Хьоьга кхайкхира со. Хьалдолчу Эле ас дийхира:
[10] «ХӀун пайда бу сох, со хӀаллаквича? Хьуна хӀун лур ду, со коша чу вижча? Сан докъо хастам бийр буй те Хьуна? Сох йисинчу чено Хьан бакъдерг кхайкхор дуй те?
[11] Веза Эла, со дӀа а хазий, къинхетам бехьа сох! Веза Эла! Хилахьа сан гӀоьнча».
[12] Ахь сан белхаран метта, суна хелхар дели, сингаттаман духарш дӀа а эцна, самукъадаларан духарш суна тӀедуьйхи.
[13] Сан сино, ца соцуш, хеставойла Хьо. Сан Веза Дела, ас хестор ву Хьо гуттара а.