[1] Эшарш локхучу тобанан куьйгалхочуьнга: Везачу Элан ялхо волчу Даудан назма.
[2] Ӏесачун кӀорггера даг чуьра аьрхалла йистхуьлу цуьнга. Цуьнан бӀаьргаш чохь Делах кхерар дац.
[3] Шех лаьцна оццул лекха ойла ю цуьнан, шен къинош а гина, уьш ца деза кхетам ца кхаччал.
[4] Цуьнан багара схьадолу дешнаш харц а, мекара а ду. Кхетаме хилар а, дика лелар а цо дитина ду.
[5] Вижинчохь а вон ойланаш йо цо. Иза харц некъа тӀе а волу, вониг дарх дӀа а ца воьрзу.
[6] Веза Эла! Хьан хедар боцу безам стигалшка дӀакхочу, Хьан тешаме хилар мархашка кхочу.
[7] Хьан нийсо лекха лаьмнаш санна ю. Хьан кхел кӀорга хӀордаш санна ю. Адамаш а, бежанаш а Ӏалашдо Ахь, Веза Эла!
[8] Мел чӀогӀа мехала бу-кх Хьан хедар боцу безам, Дела! Хьан тӀемийн ӀиндагӀехь адамаша шаьш лардойту.
[9] Хьан токхечу цӀийнах дузуш ду уьш. Хьайх долучу диканан хица хьогалла дӀайоккху Ахь церан.
[10] ХӀунда аьлча Хьоьгара ду дахаран хьоста. Хьоьца йолчу серлонгахь серло го тхуна.
[11] Дахдехьа Хьо вевзачарна Хьайн безам балар а, догцӀеначарна Хьайн нийсо лелор а.
[12] Курачун ког суна тӀе ма болийла, къилахь волчун куьйго со дӀа а ма эккхавойла.
[13] Зулам лелош берш цигахь охьаэгна. Шаьш охьабахкарна, уьш хьала ца гӀовттало.