[1] Yon sòm David. Pou fè sonje.
[2] Letènèl, pa pini m lè ou fache, Pa chatye m lè ou an kòlè.
[3] Paske, flèch ou yo pèse mwen; Men ou peze mwen.
[4] Akòz kòlè ou, pa gen anyen ki an sante nan kò mwen. Akòz peche m, pa gen lapè nan zo mwen.
[5] Paske, inikite m yo depase tèt mwen. Tankou yon fado lou, yo twò lou pou mwen.
[6] Maleng mwen yo santi, y ap koule, Akòz foli mwen.
[7] Mwen bosi, mwen akable anpil anpil. Tout lajounen m ap mache nan tristès.
[8] Ren m ranpli ak doulè k ap boule m, Pa gen anyen ki an sante nan kò mwen.
[9] Mwen san fòs, mwen kraze anpil anpil; M ap jemi akòz kè m k ap ajite.
[10] Senyè, tout dezi m devan ou. Soupi m yo pa kache devan ou.
[11] Kè m ajite, fòs mwen abandone m. Epitou, je m pa ban m limyè ankò.
[12] Moun ki renmen m yo ak zanmi m yo kanpe lwen maleng mwen yo; Fanmi m yo kanpe lwen.
[13] Moun k ap chèche pran lavi m yo tann pyèj pou mwen. Moun ki vle malè rive m yo diskite mechanste. Tout lajounen y ap medite pou fè manti.
[14] Men, mwen menm, mwen tankou yon moun ki soud, mwen pa tande. Mwen tankou yon bèbè ki pa louvri bouch li.
[15] Mwen tankou yon moun ki pa tande, Yon moun ki pa gen repons nan bouch li.
[16] Letènèl, se ou m ap tann, Ou menm, Senyè mwen, Bondye mwen, w a reponn.
[17] Paske, mwen di: Pa kite yo rejwi sou mwen, Lè pye m glise, pa kite yo leve tèt yo sou mwen.
[18] Mwen prèt pou m tonbe, Doulè mwen toujou devan m.
[19] Mwen avwe inikite m. Mwen twouble akòz peche m.
[20] Lènmi m yo vivan, yo fò. Moun ki rayi m san rezon yo anpil.
[21] Yo rann mwen mal pou byen. Yo fè m lènmi, paske m ap chèche fè byen.
[22] Letènèl, pa abandone m. Bondye mwen, pa rete lwen mwen.
[23] Prese vin ede m, Senyè mwen, delivrans mwen.