[1] Louwe Letènèl! Selebre Letènèl, paske li bon. Mizerikòd li p ap janm fini.
[2] Kilès k ap anonse mèvèy Letènèl yo? Kilès k ap fè konnen tout lwanj li?
[3] Benediksyon pou moun ki kenbe jijman l yo. Ki pratike lajistis tout tan.
[4] Letènèl, sonje m nan favè ou fè pèp ou, Vizite m ak delivrans ou,
[5] Pou m ka wè bonè moun ou chwazi yo, Pou m ka rejwi nan kontantman nasyon ou, Pou m ka fyè ansanm ak eritaj ou a.
[6] Nou peche tankou zansèt nou yo. Nou komèt inikite, nou fè sa ki mal.
[7] Lè paran nou te nan peyi Lejip, yo pa t okipe mèvèy ou yo, Yo pa t sonje labondans favè ou yo; Men yo te fè rebèl bò lanmè a, bò lanmè Wouj.
[8] Men, Bondye sove yo poutèt non li, Pou l fè konnen pisans li.
[9] Li menase lanmè Wouj, epi li seche; Li fè yo mache nan labim, tankou nan yon dezè.
[10] Li sove yo anba men sila a ki te rayi yo, Li delivre yo anba men lènmi an.
[11] Dlo yo te kouvri advèsè yo; Menm youn nan yo pa t rete.
[12] Epi yo te kwè nan pawòl Letènèl yo, Yo chante lwanj li.
[13] Men, yo te bliye zèv li yo vit, Yo pa t tann plan li.
[14] Yo te plen ak move lanvi nan dezè a, Yo te tante Bondye nan tè dezole a.
[15] Letènèl ba yo sa yo te mande, Epi li voye maladi deperisman nan mitan yo.
[16] Yo te rayi sò Moyiz nan kan an, Sò Aawon, sila ki te apa pou Letènèl la.
[17] Latè te louvri, li anglouti Datan, Latè te fèmen sou gwoup Abiram yo.
[18] Dife te limen sou gwoup la, Flanm dife te boule mechan yo.
[19] Yo fabrike yon jèn towo bèf nan Orèb, Yo koube devan yon imaj an metal dife fonn.
[20] Yo chanje glwa yo Pou imaj yon bèf ki manje zèb.
[21] Yo bliye Bondye, sovè yo, Ki te fè gwo bagay ann Ejip,
[22] Mirak nan peyi Kam nan, Bagay terib tou pre lanmè wouj.
[23] Li te pale pou l detui yo, Men, Moyiz moun li chwazi a, te kanpe fèm devan li, Pou detounen kòlè l epi anpeche l detui yo.
[24] Yo te meprize peyi plezi a, Yo pa t kwè nan pawòl li.
[25] Yo t ap bougonnen nan tant yo, Yo pa t obeyi vwa Letènèl.
[26] Li leve men pou l sèmante l kont yo, Pou l fè yo tonbe nan dezè a,
[27] Pou l fè desandans yo tonbe pami nasyon yo, Pou l dispèse yo nan peyi yo.
[28] Yo te atache ak Baal Peyò; Yo manje vyann sakrifye pou mò.
[29] Yo pwovoke Letènèl ak aksyon yo, Epi yon maladi eklate nan mitan yo.
[30] Fineas te kanpe pou l aji, Epi maladi a te sispann.
[31] Bondye te konsidere sa kòm jistis pou li, Jenerasyon apre jenerasyon, pou tout tan.
[32] Yo te pwokove Letènèl bò dlo Meriba yo, Malè te rive Moyiz akòz yo menm.
[33] Paske, yo t ap fè rebèl kont lespri li, Konsa, Moyiz te pale rèd ak bouch li.
[34] Yo pa t detui pèp yo, Jan Letènèl te di yo a.
[35] Men, yo te melanje ak nasyon yo, Yo aprann koutim yo.
[36] Yo sèvi zidòl yo, Yo te devni yon pyèj pou yo.
[37] Yo sakrifye pitit gason yo Ak pitit fi yo bay demon.
[38] Yo vèse san moun ki inosan, San pitit gason ak pitit fi yo; Yo sakrifye yo bay zidòl Kanaan yo, Yo pwofane peyi a ak san.
[39] Yo te sal tèt yo nan pwòp aksyon yo, Yo aji kòm pwostitiye nan pwòp zak yo.
[40] Kòlè Letènèl te limen kont pèp li, Li te vin rayi eritaj li.
[41] Li livre yo nan men nasyon yo, Moun ki te rayi yo domine sou yo.
[42] Lènmi yo te peze yo, Yo te imilye anba men yo.
[43] Li delivre yo plizyè fwa, Men, yo fè rebèl kont li nan dezobeyisans yo, Yo plonje nan inikite yo.
[44] Men, li te wè yo nan detrès yo, Lè li te tande kri yo.
[45] Li sonje alyans li avèk yo, Li te gen pitye daprè gran bonte li.
[46] Li te fè yo jwenn favè Devan moun ki fè yo prizonye.
[47] Sove nou, Letènèl, Bondye nou! Rasanble nou nan mitan nasyon yo Pou nou ka louwe non ou ki sen, Pou nou ka fyè nan fè lwanj ou.
[48] Beniswa Letènèl, Bondye Izrayèl la, depi tout tan ak pou tout tan. Se pou tout pèp la di: Amèn! Louwe Letènèl!