[1] Pou maestwo koral la. Yon sòm David.
[2] Letènèl, delivre m anba moun ki mechan! Pwoteje m kont moun ki vyolan,
[3] Moun k ap fè plan mechanste nan kè yo, Yo toujou ap konplote pou fè lagè.
[4] Yo file lang yo tankou lang sèpan, Yo gen yon pwazon sèpan aspik nan bouch yo. – Poze!
[5] Letènèl, pwoteje m kont men mechan yo, Kenbe m kont moun k ap fè vyolans, K ap fè plan pou fè m tonbe!
[6] Awogan yo tann yon pyèj pou mwen; Yo tann pèlen kòd sou tout chemen an, Yo tann pyèj pou mwen. – Poze!
[7] Mwen di Letènèl: Ou se Bondye mwen! Letènèl, koute bri plent mwen yo!
[8] Letènèl, Senyè: Ou se fòs delivrans mwen, Ou kouvri tèt mwen nan jou batay la.
[9] Letènèl, pa bay mechan an sa l dezire, Pa kite pwojè l yo reyisi pou l pa vante tèt li! – Poze!
[10] Se pou mechanste yo te di a tonbe sou tèt yo, Moun ki fè laviwonn mwen yo.
[11] Se pou chabon dife tonbe sou yo, Se pou yo jete yo nan dife, Nan labim kote yo p ap leve ankò!
[12] Pa kite moun ki gen lang manti tabli sou latè, Se pou malè chase moun vyolan sanzatann!
[13] Mwen konnen Letènèl fè malere a jistis. Li fè pòv la jistis.
[14] Wi, jis yo ap louwe non ou, Moun ki dwat yo ap rete devan fas ou.