[1] A' ye Matigi tanu ni dɔnkili kura ye. Dugukolo kan mɔgɔw bɛɛ, a' ye Matigi tanuli dɔnkili da.
[2] A' ye dɔnkili da Matigi ye k'a tɔgɔ bonya, ka a ka kisili kɛwalew welewele da don o don.
[3] Aw ka a nɔɔrɔ lakali mɔgɔw cɛma, ka a ka kabako kɛlenw lakali siyaw bɛɛ cɛma.
[4] K'a masɔrɔ Matigi ka bon, a ka kan ni tanuli ye badaa. Ale ye siranfɛnba ye ka tɛmɛn bato fɛn tɔw bɛɛ kan.
[5] Ɔwɔ, siyaw ka bato fɛnw bɛɛ ye boliw ye, nka Matigi ye sankolow da.
[6] Nɔɔrɔ ni bonya bɛ a ɲɛ kɔrɔ, barika ni cɛɲɛ ye a ka yɔrɔ senuma fa.
[7] Dugukolo kan mɔgɔw bɛɛ ka Matigi tanu, a' ye Matigi nɔɔrɔ ni a bonyaba tanu.
[8] A' ye Matigi tɔgɔ nɔɔrɔma tanu ka na ni nili fɛnw ye a ka dukɛnɛ la.
[9] A' ye aw ɲɔngiri duguma Matigi ɲɛ kɔrɔ k'a bato, aw masirilen ni senuya ye. Dugukolo kan mɔgɔw, aw bɛɛ ka yɛrɛyɛrɛ a ɲɛ kɔrɔ.
[10] Aw k'a fɔ siyaw cɛma ko: «Matigi ye Masaba de ye.» Dugukolo bamalen don, a tɛ lamaga, Matigi na kiri tigɛ siyaw kan ni tilennenya ye.
[11] Sankolo ka nisɔndiya, dugukolo ka ɲagalikan bɔ. Kɔgɔji ni a kɔnɔ fɛnw bɛɛ ka mankanba bɔ.
[12] Kungokolon ni a kɔnɔ fɛnw bɛɛ ka ɲagalikan bɔ, kungo kɔnɔ jiriw bɛɛ ka ɲagali dɔnkili da
[13] Matigi ɲɛ kɔrɔ, k'a masɔrɔ a bɛ na ka kiri tigɛ dugukolo kan. A na kiri tigɛ diɲɛ kan ni tilennenya ye ka kiri tigɛ siyaw kan, k'a masɔrɔ a ye kantigi ye a ka layidu kow la.