[1] Asaf ka dɔnkili. Ala, mun kosɔn i ye an bila kudayi? I ye saga minw gɛnbaa ye, mun kosɔn i diminna olu kɔrɔ?
[2] I ye i ka mɔgɔ minw sɔrɔ kabini tuma jan, ka u kunmabɔ ka u kɛ i ciyɛn ye, i ka i hakili to olu la. I ye nin Sion kulu min kɛ i sigi yɔrɔ ye, i ka i hakili to o fana la.
[3] Nin yɔrɔ min tiɲɛnnen mɛnna, i ka wuli ka na o filɛ, an jugu ye yɔrɔ senuma kɔnɔ fɛnw bɛɛ tiɲɛn.
[4] I juguw ye pɛrɛnkanba bɔ i ka dukɛnɛ cɛmancɛ la. U ye u ka darapow siri ka kɛ u ka taamashyɛnw ye.
[5] U ye u yɛrɛw jira i ko mɔgɔ minw ye jelew ta ka taa tu tigɛ.
[6] U ye Alabatosoba kɔnɔ masiri fɛnw bɛɛ ci ni jelew ni maritow ye ka ban.
[7] U ye tasuma tugu i ka yɔrɔ senuma la, u ye i sigi yɔrɔ nɔgɔ ka ban.
[8] U y'a fɔ u yɛrɛ kɔnɔ ko: «A' ye na, an ka u ɲɔɲɔ yɔrɔ nin kelen.» Ala ka mɔgɔw tun bɛ u lajɛ jamana yɔrɔ minw na, u ye olu bɛɛ jeni.
[9] An tɛ an ka taamashyɛnw ye tun, kira si tɛ yan tun, mɔgɔ si tɛ an cɛma min bɛ nin ko ban tuma dɔn.
[10] Ala, i juguw na to ka juguya kɛ fo tuma jumɛn? Juguw na to ka i tɔgɔ tiɲɛn fo tuma jumɛn?
[11] Mun kosɔn i tɛ i bolo, i kininbolo mɔɔnɔbɔ ka i juguw halaki?
[12] Nka Ala ye ne ka masakɛ ye tuma bɛɛ, a bɛ kisili kɛ dugukolo yɔrɔw bɛɛ la.
[13] Ɔwɔ, i ye kɔgɔji cɛ tila fila ye i ka sebaaya barika la, ka kɔgɔji jukɔrɔ dakabana fɛnw kunkolow ci.
[14] E de ye Leviatan kunkolo ci, ka o di kungokolon mɔgɔw ma u k'a dun.
[15] E de ye ji boyiw da yɛlɛ, ji caman woyora. Ji boyi minw tun tɛ ja, i ye olu bɛɛ ja.
[16] Tile ye i ta ye, su fana ye i ta ye, e de ye kɛnɛyeelen ni tile da.
[17] I ye dugukolo danw bɛɛ sigi, i ye samiyɛ ni tilema kɛ.
[18] Matigi, i hakili to a la, ko an juguw bɛ yɛlɛ bɔ i la. Siya hakilintan bɛ i neni.
[19] I kana i ka ntubanni ni to wara bolo, i kana ɲinɛ i ka sɛgɛnbaatɔ ni kɔ badaa.
[20] I hakili to i ka layidu la k'a masɔrɔ dugukolo dibima yɔrɔw falen bɛ mɔgɔ farinmaw la.
[21] Fanga digira mɔgɔ minw na, olu maloyalen kana kɔsegin. Faantan ni kɔlibaatɔ ka i tɔgɔ tanu.
[22] Ala, i ka wuli ka i yɛrɛ lafasa, ka i hakili to a la ko mɔgɔ hakilintan bɛ i neni don o don.
[23] I kana ɲinɛ i juguw pɛrɛnkan kɔ. Minw bɛ wuli i kama, olu pɛrɛnkan bɛ bonya ka ta'a fɛ.