[1] Dawuda ka hakili jigin dɔnkili Zaburu.
[2] Matigi, i diminnen kana ne kɔrɔfɔ, i dusu bɔlenba kana ne kolo,
[3] katuguni i ka biɲɛw ye ne sɔgɔ, i bolo digira ne la kosɛbɛ.
[4] I ka dimiya sera ne farisogo yɔrɔw bɛɛ ma, ne kolow ma lafiya si sɔrɔ ne ka jurumu kosɔn.
[5] K'a masɔrɔ ne ka tilenbaliya kow cayara fo ka ne datugu. U kɛra doniba ye, ne tɛ se u kɔrɔ.
[6] Ne jolidaw tolila ka nɛn bɔ ne ka nalonmaya kosɔn.
[7] Ne bugɔra ka ne kuru fo ka se a dan na. Ne dusu kasilen bɛ taama niɲɛji ye don o don.
[8] Tasumba ye ne solo jeni. O dimi ma dogo ne farisogo yɔrɔ si la.
[9] Barika si tɛ ne la tun, ne fari yɔrɔw bɛɛ ɲɔɲɔna. Ne bɛ nwunan ne dusukun tɔɔrɔ kosɔn.
[10] Matigi, fɛn min ko bɛ ne la, o bɛɛ bɛ i ɲɛ kɔrɔ, ne ka nwunankanba dogolen tɛ i la.
[11] Ne sɔnkun bɛ yɛrɛyɛrɛ, ne barika banna, hali neɲɛ man di tun.
[12] Ne teriw ni ne dɔnbaaw tɛ gɛrɛ ne la ne jolida kosɔn, ne so mɔgɔw ye u mabɔ ne la.
[13] Minw b'a fɛ ka ne faga, olu ye jan da neɲɛ. Minw b'a fɛ ka ne bɔnɛ ne ni la, olu ye fagali cogo labɛn. U tɛ miiri foyi la fɔ ka dabali jugu kɛ ne kama.
[14] Nka ne bɛ i ko tulo geren, ne tɛ foyi mɛn. Ne bɛ i ko bobo, ne tɛ kuma.
[15] Ɔwɔ, ne bɛ i ko mɔgɔ min tɛ mɛnni kɛ, a dawolo tɛ jaabili kɛ.
[16] Matigi, ne bɛ ne jigi da e de kan, i ka ne jaabi, Matigi, ne ka Ala.
[17] Katuguni ne ko: «U kanaɲagali ne kosɔn. Ne sen bɛ cɛɛnɛ tuma min na, u kana u yɛrɛw bonya ne kama.»
[18] Katuguni ne bitɔ don, ne ka tɔɔrɔw bɛ ne ɲɛ kɔrɔ tuma bɛɛ.
[19] Ne bɛ jɔ ne ka tilenbaliya kow la. Ne na nimisa ne ka jurumu la.
[20] O bɛɛ n'a ta ne juguw ka kɛnɛ, u barika ka bon. Minw bɛ ne koniya ni kun t'a la, olu ka ca.
[21] U bɛ ko ɲuman sara ni ko jugu ye, u bɛ ne la ɲini katuguni ne bɛ ko ɲuman kɛ.
[22] Matigi, i kana ne bila, i kana i yɔrɔ janya ne la, ne ka Ala.
[23] Matigi, i tɛliya ka na ne dɛmɛ, e de ye ne kisibaa ye.