[1] Dɔnkili dalaw kuntigi ka dɔnkili. Dawuda ka Zaburu. Dɔnkili.
[2] Ala ka wuli, a juguw ka jɛnsɛn, a koniyabaaw ka boli ka bɔ a ɲɛ kɔrɔ.
[3] I na u ban i ko sisi bɛ ban cogo min na, di kɛɲɛ bɛ yeele tasuma la cogo min na, mɔgɔ juguw na ban ka bɔ Ala ɲɛ kɔrɔ ten.
[4] Nka mɔgɔ tilennenw na ɲagali, u na nisɔndiya Ala ɲɛ kɔrɔ ka ɲagaliba sɔrɔ.
[5] Aw ka dɔnkili da Ala ye, aw ka a tɔgɔ tanuli dɔnkili da. Min bɛ kungokolon cɛ tigɛ ni a ka wotoro ye, aw ka sira labɛn o ɲɛ. A tɔgɔ ko Matigi, a' ye nisɔndiya a ɲɛ kɔrɔ.
[6] Ale de ye falatɔw fa ni muso cɛ salenw lafasabaa ye. Ale, Ala sigilen bɛ a ka yɔrɔ senuma la.
[7] Mɔgɔ minw tora u kelen na, Ala bɛ sigi yɔrɔ lafiyalen di u ma. A bɛ jɔnw hɔrɔnya ka hɛrɛ di u ma, nka kuncɛbaw na taa sigi dugukolo lankolon na.
[8] Ala, i bɔra ka i ka mɔgɔw ɲɛ minɛ tuma min na, ka u ɲɛ minɛ kungokolon kɔnɔ, Sela,
[9] dugukolo yɛrɛyɛrɛla, sankolo ye ji bɔ. Sinayi kulu fana yɛrɛyɛrɛla Ala ɲɛ kɔrɔ, Israɛl ka Ala kɔni.
[10] Ala, i bɛ ko ɲuman kɛ ka sanji di i ka ciyɛn ma. U barika tun dɛsɛra, i y'u barika bonya.
[11] I ka mɔgɔw bɛ nin jamana kɔnɔ. Ala, i ye faantanw dɛmɛ ni i ka ɲumaya ye.
[12] Matigi bɛ ci di, muso minw bɛ o kibaru welewele da, olu ye jamaba ye.
[13] Kɛlɛbolow la masakɛw bɛ boli, ɔwɔ, u bɛ boli. Muso minw bɛ to so kɔnɔ, olu na fɛn cɛlenw tilatila.
[14] Aw dalen bɛ sagabonw cɛma, k'a sɔrɔ ntubanni kamanfuraw datugulen bɛ ni warijɛ ye, a jolow datugulen bɛ ni sanu yɛrɛwolo ye.
[15] Sebaayabɛɛtigi Ala ye masakɛw jɛnsɛn tuma min na, a kɛra i ko neje jiginnen Zalmon kulu kan.
[16] Ala ka kuluw, Basan kuluw, kulu kun caman, Basan kuluw,
[17] kulu kun caman bɛ kulu min kan, Ala ye kulu min ɲɛnatɔmɔ ka kɛ a sigi yɔrɔ ye, mun kosɔn o keleya bɛ aw la? Ɔwɔ, Matigi na sigi yen badaa.
[18] Ala ka wotoro bɛ waa mugan bɔ, wotoro waa caman caman don. Matigi bɛ na u cɛma, ka bɔ Sinayi kulu kan ka don a ka yɔrɔ senuma kɔnɔ.
[19] I yɛlɛnna san fɛ, i ye jɔnw caman cɛ ka taa. I ye nili fɛnw minɛ mɔgɔw fɛ, hali murutilenw fɛ, walisa e, Matigi Ala ka sigi yen.
[20] Matigi ka tanu. A bɛ an ka doniw ta don o don, an kisibaa Ala don.
[21] Ala ye an kisibaa Ala ye. Matigi Ala de bɛ mɔgɔ tila saya la.
[22] Ɔwɔ, Ala na a juguw kun ci, min bɛ taa ɲɛ a ka juguya la, a na o tigi kuncɛ sima ci.
[23] Matigi ko: «Ne bɛ na ni u ye ka bɔ Basan, ka u sama ka bɔ kɔgɔji dun na
[24] walisa i ka i sen su joli la, walisa i ka wuluw nɛnkun ka a niyɔrɔ sɔrɔ i juguw la.»
[25] Ala, u ye i taama cogo ye, ne ka Ala, ne ka Masakɛ taamatɔ i ka batosoba senuma kɔnɔ.
[26] Dɔnkili dalaw bɛ taa ɲɛ fɛ, dɔnkɛlaw tugulen bɛ u kɔ ni fɔlifɛnw ye. Npogotigiw bɛ dununw fɔ cɛmancɛ la.
[27] Aw ka Ala tanu jamaba la, aw Israɛl bɔnsɔnw ka Matigi tanu.
[28] A filɛ, u sinnaban Benjamɛn bɛ u ɲɛ fɛ, Juda ka faamaw ni u ka kɛlɛbolow tugulen bɛ ale kɔ, Zabulɔn ka faamaw ni Nefitali ka faamaw tugulen bɛ olu kɔ.
[29] I ka Ala ye ci fɔ ko i ka i barika bonya. Ala, i ye ko min kɛ an ye, i ka o sabati.
[30] K'i to i batosoba kɔnɔ, i bɛ Jerusalɛm mara. Masakɛw bɛ na nili fɛnw di i ma yen.
[31] I ka buruku la wara kɔrɔfɔ, ani nturakulu ni siyaw ka misidenw fana, fo u bɛɛ ka kolo i ye ka warijɛ di i ma. Kɛlɛ ko ka di siya minw ye, i ka olu jɛnsɛn.
[32] Mɔgɔbaw bɛ na ka bɔ Misira, Etiopi na tɛliya ka a bolo kɔrɔta Ala ye.
[33] Dugukolo kan masayaw bɛɛ, aw ka dɔnkili da ka Ala bonya, aw ka tanuli dɔnkili da Matigi ye. Sela.
[34] Min bɛ taa ɲɛ sankolo la, sankolo banbali la, a' ye dɔnkili da o ye. A filɛ, a bɛ a kan bɔ, a ka sebaaya kanba.
[35] Aw k'a fɔ ko Ala barika ka bon. A bonyaba bɛ Israɛl mara, a barika bɛ sankolow la.
[36] Ala, ka i to i ka yɔrɔ senuma la, i ye siranfɛnba ye. Ale ye Israɛl ka Ala ye, min bɛ barika ni sebaaya di a ka mɔgɔw ma. Ala ka tanu!