[1] Dawuda ka delili. Matigi, i tulo majɔ ka ne jaabi, k'a masɔrɔ ne ye faantanɲɛnibaatɔ de ye.
[2] I ka ne mara, sabu ne ye i ɲɛsiranbaa ye. Ne ye i ka baaraden ye. Ne ye ne yɛrɛ kalifa i ma, ne ka Ala, i ka ne kisi.
[3] Matigi, i ka hinɛ ne la, k'a masɔrɔ ne bɛ tile ka kasi i nɔ fɛ.
[4] Matigi, i ka i ka ɲagali kɛ i ka baaraden dusu la, sabu ne bɛ ne dusu sin i ma,
[5] k'a masɔrɔ Matigi, e ka ɲi, i bɛ sɔn ka yafali kɛ. I ka makari ka bon i tɔgɔ welebaaw bɛɛ la.
[6] Matigi, i ka ne ka delili lamɛn, ka i tulo majɔ ne nwunankan na.
[7] Ne na i tɔgɔ wele ne degun don na, k'a masɔrɔ i bɛ ne jaabi.
[8] Matigi, i bɔɲɔgɔnko si tɛ bato fɛnw cɛma, i ka kɛwalew bɔɲɔgɔnko tɛ.
[9] Matigi, i ye siya minw da, olu bɛɛ bɛ na u ɲɔngiri i ɲɛ kɔrɔ ka i tɔgɔ bonya,
[10] k'a masɔrɔ i ka bon, i bɛ kabakow kɛ, e kelenpe de ye Ala ye.
[11] Matigi, i ka ne kalan i ka sira ko la, ne na i ka tiɲɛ sira taama. I ka ne dusukun dege i ɲɛsiran na.
[12] Matigi, ne ka Ala, ne na i tanu ni ne dusukun bɛɛ ye ka i tɔgɔ bonya tuma bɛɛ,
[13] k'a masɔrɔ i ka makari ka bon ne ta fan fɛ, i ye ne ni sama ka bɔ saya dibi la.
[14] Kuncɛbaw wulila ne kama, Ala, mɔgɔ farinmaw b'a fɛ ka ne faga, u tɛ miiri i ko la fewu.
[15] Nka e Matigi ye Ala makarima hinɛma ye, i tɛ dimin joona, i bɛ muɲuli kɛ, i ka kantigiya ka bon.
[16] I ka i yɛlɛma ne fan fɛ ka makari ne la, ka i barika di i ka baaraden ma, ka i ka jɔnmuso denkɛ kisi.
[17] I ka hɛrɛ sɔrɔ taamashyɛn jira ne la, walisa ne juguw ka o ye ka maloya. Matigi, e de bɛ ne mara ka ne dusu saalo.