<Zaburuw 14

[1] Dɔnkili dalaw kuntigi ka dɔnkili. Dawuda ta. Hakilintan y'a fɔ a yɛrɛ kɔnɔ ko: «Ala tɛ yen.» Mɔgɔw y'u yɛrɛ toli, u jogo ka jugu kosɛbɛ. Koɲumankɛla si tɛ yen.

[2] Matigi y'a to sankolo la k'a ɲɛ jigin ka Hadamadenw filɛ, yala ni hakilitigi bɛ u la min bɛ Ala ɲini.

[3] U bɛɛ filila, u bɛɛ kɛra nafantanw ye ɲɔgɔn fɛ. Koɲumankɛla si tɛ yen, hali kelenpe.

[4] Nin kojugukɛlaw bɛɛ ye hakilintanw ye wa? U bɛ ne ka mɔgɔw dun i ko to. U tɛ Matigi tɔgɔ wele abada.

[5] Siranba na cun u kan joona, k'a masɔrɔ Ala bɛ siya tilennen cɛma.

[6] Aw b'a fɛ ka faantanw jigi tigɛ, nka Matigi ye u dogo yɔrɔ ye.

[7] Jɔn bɛ na ni kisili ye ka bɔ Sion ka Israɛl kisi? Ni Matigi ye a ka mɔgɔw labɔ jɔnya la tuma min na, Yakuba na ɲagali, Israɛl na nisɔndiya.