[1] Dɔnkili dalaw kuntigi ka dɔnkili, min dara Jedutun ta cogo la. Asaf ka Zaburu.
[2] Ne bɛ ne kan bɔ ka kasi Ala nɔ fɛ, ne bɛ Ala deli walisa a ka ne jaabi.
[3] Ne ye Matigi ɲini ne degun don na, ne bolo kɔrɔtalen tora su fɛ, a ma dabila. Ne dusu ma sɔn ka saalo.
[4] Ne bɛ ne hakili jigin Ala la ka nwunan. Ne bɛ miiri, ne ni tɔɔrɔla ne kɔnɔ. Sela.
[5] I ma sɔn ne ka sunɔgɔ su fɛ, ne hakiliɲaaminen don, ne tɛ se ka kuma.
[6] Ne bɛ miiri tile tɛmɛnnen kɔrɔw ani san tɛmɛnnen kɔrɔw ko la.
[7] Ne bɛ ne hakili jigin ne ka dɔnkiliw la su fɛ ka miiri o la ne dusukun na. Ne ni b'a fɔ ko:
[8] «Matigi na an fililen to badaa wa? A tɛna hinɛ an na wa?
[9] A ka ɲumaya tɛna se an ma tun wa? A ka layidu banna wa?
[10] Alaɲinɛna fo a tɛna hinɛ an na tun wa? A dusu diminnen tɛ sɔn ka makari an na tun wa?» Sela.
[11] O kɔ, ne ko: «Ne ka tɔɔrɔ sababu filɛ nin ye, ko Kɔrɔtalenba kininbolo tɛ a cogo kɔrɔ la.»
[12] Ne na ne hakili jigin Matigi ka sebaaya nɔɔrɔmaw la. Ɔwɔ, ne na ne hakili to i ka kabako kɛlen kɔrɔw la.
[13] Ne na miiri i ka kɛwalew bɛɛ la, ka tasi i ka koba kɛlenw la.
[14] Ala, i ka siraw ka senu, ala jumɛn ka bon i ko an ka Ala?
[15] I ye Ala ye min bɛ kabakow kɛ, i ye i ka sebaayaba jira mɔgɔw la.
[16] I ye i ka mɔgɔw tila ni i bolo ye, Yakuba denw ni Yusufu denw kɔni. Sela.
[17] Ala, kabini jiw ye i ye, jiw ye i ye tuma min na, u siranna. Ji dingɛ dunbaw yɛrɛyɛrɛla.
[18] Ji caman bɔra sankabaw la, san kulula, i ka biɲɛw fana bonna fan bɛɛ la.
[19] I ka sankulukan bɔra fununfunun la, san yɛgɛyɛgɛ ye kɛnɛ bɔ diɲɛ yɔrɔw bɛɛ la. Dugukolo lamagara ka yɛrɛyɛrɛ.
[20] I ye sira ci kɔgɔji cɛma, ka siraba bɔ jiba cɛma, nka i senda yɔrɔw ma ye.
[21] I ye i ka mɔgɔw ɲɛ minɛ Musa ni Aron bolo i ko sagakulu.