[1] Matigi, ne bɛ ne kalifa i ma, ne kana maloya abada.
[2] I ka ne kisi ka ne sama ka bɔ farati yɔrɔ la i ka tilennenya kosɔn. I tulo majɔ ne kan na ka ne kisi.
[3] I ka kɛ ne ka farakurun ni ne dogo yɔrɔ ye, walisa ne ka dogo yen tuma bɛɛ. I ye ci di walisa ne ka kisi, k'a masɔrɔ i ye ne ka farakurun ni ne ka kɛlɛ kunbɛn so ye.
[4] Ne ka Ala, i ka ne kisi ka bɔ mɔgɔ juguw bolo, mɔgɔ jugu tilenbali minw bɛ fariya kow kɛ,
[5] k'a masɔrɔ Matigi Ala, i ye ne jigi ye. Ne ye ne kalifa i la kabini ne denmisɛnma.
[6] Ne ye ne sinsin i la kabini ne bange tuma. Kabini ne bangera, e ye ne mara, ne na i tanu tuma bɛɛ.
[7] Ne kɛra kabako fɛn ye mɔgɔ camanɲɛ na, nka e ye ne dogo yɔrɔ barikama ye.
[8] Ne da na fa tanuli dɔnkili la, ka i tɔgɔ bonya don o don.
[9] Ni ne kɔrɔla, i kana ne fili, ni ne barika banna, i kana ne bila,
[10] k'a masɔrɔ ne juguw bɛ kuma ne ko la, minw bɛ ne ni ɲini, olu bɛ jɛ siri ne kama.
[11] U ko: «Ala y'a bila, an ka a nɔgɛn ka a minɛ, k'a masɔrɔ tilabaa si t'a la.»
[12] Ala, i kana i mabɔ ne la, ne ka Ala, i tɛliya ka ne dɛmɛ.
[13] Minw b'a fɛ ka ne faga, olu ka maloya ka halaki. Minw b'a fɛ ka ne bɔnɛ ne ni la, olu ka maloya ka u kun suuli.
[14] Nka ne jigi sigilen don tuma bɛɛ, ne bɛ to ka barika da i ye tuma bɛɛ.
[15] Ne da na i ka tilennenya ko fɔ ka i ka kisili ko lakali don o don, katuguni i ka ko ɲuman kɛlenw dama tɛ dɔn.
[16] Matigi Ala, ne na i ka kabakow lakali yɔrɔ bɛɛ. Ne bɛ i ka tilennenya ko fɔ, i kelenpe ta.
[17] Ala, i ye ne kalan kabini ne denmisɛnma, ne ye i ka ko ɲuman kɛlenw lakali fo ka na se bi ma.
[18] Ala, hali ni ne kɔrɔla, i kana ne bila, ka ne kunsigi jɛ, i kana ne to yen, walisa ne ka i ka sebaaya ko fɔ sisan mɔgɔw ye ka i fanga ko lakali bɔnsɔn nataw bɛɛ ye.
[19] Ala, i ka tilennenya sera fo sankolo la, i ye i ka kabakobaw kɛ ka dafa. Ala, jɔn bɛ i ko e?
[20] E min ye tɔɔrɔ ni bɔnɛ caman jira an na, i naɲɛnamaya di an ma ko kura, ka an labɔ halaki dingɛ dunba kɔnɔ.
[21] I ka dɔ fara ne bonya kan, ka ne dusu saalo ko kura.
[22] Ne ka Ala, ne na barika da i ye ni npɔlɔn juruw ye ko kura ka i ka kantigiya ko fɔ dɔnkili la. Israɛl ka Senuma, ne na i tanuli dɔnkili da ni nkɔni ye.
[23] Ni ne bɛ i tanuli dɔnkili da tuma min na, i ye ne dawolo ni ne ni min kunmabɔ, olu na ɲagali dɔnkili da i ye.
[24] Ne nɛn fana na i ka tilennenya ko fɔ don o don, k'a masɔrɔ ne ka bɔnɛ tun ka di minw ye, olu maloyara ka u kun biri.