[1] Dɔnkili dalaw kuntigi ka dɔnkili. Jedutun ta. Dawuda ka Zaburu.
[2] Ne ko: «Ne na ne taama cogo kɔlɔsi walisa ne da kana ne bila jurumu la. Ne na karafɛ don ne da la ka mɔgɔ jugu to ne ɲɛ kɔrɔ.»
[3] Ne makunnen tora, ne ma kuma, hali ne ma kuma ɲuman fɔ. Ne ka tɔɔrɔ kow bɛ juguya ka ta'a fɛ.
[4] Ne sɔn bɛ jeni ne kɔnɔ. Ne ka miiriliw kɛra i ko tasumaba, o tuma la ne nɛnkun pɛrɛnna, ko:
[5] «Matigi, i ka ne laban ko jira ne la, ani ne si tile dan, walisa ne ka ne si tile surunya ni a janya dɔn.»
[6] A filɛ, i ye ne si tilew kɛ tɛgɛfura da yɔrɔ dama ye. Ne si dama tɛ foyi ye i ɲɛ na. Sɛbɛ la, Hadamadenw kɛra cogo o cogo, u si tɛ foyi ye dafiɲɛ kɔ. Sela.
[7] Tiɲɛ la, Hadamaden bɛ tɛmɛn i ko ja. Ɔwɔ, a bɛ mankan min ci, o bɛɛ ye yɛrɛ bonyali de ye. A bɛ nafoloba lajɛɲɔgɔn kan, nka a tɛ o sɔrɔbaa dɔn.
[8] Ayiwa Matigi, ne bɛ se ka mun kɛ sisan? Ne jigi bɛ e de kan.
[9] I ka ne kisi ne ka tilenbaliya bɛɛ ma. I kana sɔn hakilintanw ka ne yɛlɛ ka ne mafiɲɛya.
[10] Ne ye ne makun, ne tɛna ne da yɛlɛ tun, k'a masɔrɔ e de y'a kɛ.
[11] I kana ne bugɔ tun, ne halakira i bolo ka gosili fɛ.
[12] Ni i bɛ mɔgɔ tɔɔrɔ k'a kolo a ka tilenbaliya kosɔn tuma min na, i bɛ a ka ko dumanw ban i n'a fɔ ntumu datɔ. Tiɲɛ la, Hadamaden si tɛ foyi ye dafiɲɛ kɔ. Sela.
[13] Matigi, i ka ne ka delili lamɛn, ka i tulo majɔ ne kasikan na. I hakili to neɲɛji la katuguni ne bɛ i ka so i ko dunan, ne tɛmɛntɔ dɔ i ko ne bɛnbaw.
[14] I ka i ɲɛ bɔ ne la walisa ne ka barika sɔrɔ, sani ne ka taa ka bɔ yan.