[1] Dɔnkili dalaw kuntigi ka dɔnkili. Dɔnkili. Zaburu. Dugukolo kan mɔgɔw, aw ka ɲagalikanba bɔ Ala ye.
[2] A' ye a tɔgɔ nɔɔrɔma tanu dɔnkili la. A' ye barika da a ye ka nɔɔrɔ da a tɔgɔ kan.
[3] Aw k'a fɔ Ala ye ko: «I ka kɛwalew ye siran kobaw ye. I juguw na kolo i ye u da la i ka sebaayaba kosɔn.
[4] Dugukolo kan mɔgɔw bɛɛ bɛ u ɲɔngiri i ɲɛ kɔrɔ ka i tanuli dɔnkili da ka i tɔgɔ bonyaba fɔ.» Sela.
[5] A' ye na Ala ka kabakow filɛ, a bɛ u kɛ ni taamashyɛn kabakomaw ye Hadamadenw cɛma.
[6] A ye kɔgɔji yɛlɛma k'a kɛ gwele ye, u ye ba tigɛ u sen na. Anɲagalila ale barika la yen.
[7] Ale bɛ fɛn bɛɛ mara ni a ka sebaaya ye badaa. A bɛ siyaw kɔlɔsi ni a ɲɛ ye. Kuncɛbaw tɛna u kun kɔrɔta. Sela.
[8] Siyaw, a' ye barika da an ka Ala ye, ka a tanu ni dɔnkili kanba ye.
[9] Ala de ye ɲɛnamaya di an ma, a tɛ sɔn an sen ka cɛɛnɛ.
[10] Ala, e de ye an kɔrɔbɔ, i ye an kɔrɔbɔ tasuma la i ko warijɛ.
[11] I ye an don minɛli jan na ka doni girin da an kun.
[12] E de y'a to an juguw ka so boli an kunkolow la. An donna tasuma ni ji la, nka i ye an labɔ ka an ladon yɔrɔ nɛɛmama la.
[13] Ne na don i ka so kɔnɔ ni saraka jenitaw ye ka ne dafalew bɔ i ye,
[14] ne yɛrɛ da tun ye olu minw ko fɔ, ne ka tɔɔrɔ waati la.
[15] Ne na bagan tɔlɔlen bɔ ka kɛ saraka jenitaw ye i ye, ka sagajigi kɛn kɛ wusulan suma duman ye. Ne na nturaw ni bakɔrɔw kan tigɛ i ye. Sela.
[16] Aw minw bɛ siran Ala ɲɛ, a' ye na ka lamɛnni kɛ. A ye min kɛ ne dusu ye, ne na o lakali.
[17] Ne da ye a wele ko a ka na ne dɛmɛ, a tanuli dɔnkili tun bɛ ne da la.
[18] Ni ne tun sɔnna tilenbaliya ma ne dusukun na, Matigi tun tɛna ne lamɛn.
[19] Nka Ala ye ne lamɛn, a ye a tulo majɔ ne ka delili la.
[20] Ala ka tanu, a ma ban ne ka delili ma, a ma a ka makari mabɔ ne la.