[1] Dɔnkili dalaw kuntigi ka dɔnkili. Dawuda ka Zaburu.
[2] Ne ye ne jigi bɛɛ da Matigi kan k'a makɔnɔ. A ye i jɛngɛ ne fan fɛ ka ne kasikan lamɛn.
[3] A ye ne sama ka bɔ halakili dingɛba kɔnɔ, ka ne bɔ bɔrɔgɔ la. A ye ne sen jɔ fara kan ka ne sen da cogoɲɛ.
[4] A ye dɔnkili kura bila ne da la, an ka Ala tanuli dɔnkili kɔni. Ɔwɔ, mɔgɔ caman kɛra kisili seerew ye, an ka siran Matigi ɲɛ ka an jigi da a kan.
[5] Mɔgɔ min jigi dara Matigi kan ni a bɛ i mabɔ kuncɛbaya kow ani nkalontigɛlaw la, o ye dubaden ye.
[6] Matigi, ne ka Ala, i ka kabakow ni i ka ko ɲumanbaw, i ye minw kɛ an ye, dan tɛ olu la. An tɛ se ka olu jate i ɲɛ kɔrɔ. Ne tun b'a fɛ ka u ko fɔ ka u welewele da, nka u ka ca fo ne tɛ se ka u jate.
[7] Sarakaw ni nili fɛnw ko man di i ye, nka i ye lamɛnni tulo di ne ma. I ma saraka jenitaw ni jurumu yafa sarakaw ɲini ne fɛ.
[8] O tuma la ne ko: «Ne nalen filɛ, ne ko sɛbɛnna kitabu melekelen kɔnɔ.
[9] Ne ka Ala, ne b'a fɛ ka i sago kɛ. I ka sariya bɛ ne dusukun na.»
[10] Ne ye tilennenya kibaru duman fɔ jamabaɲɛ na. Ne tɛ ne da tugu, Matigi, i bɛ o dɔn.
[11] Ne ma i ka tilennenya dogo ne dusukun na, ne ye i ka kantigiya ni i ka kisili welewele da. Ne ma i ka ɲumaya ni i ka tiɲɛ dogo jamabaɲɛ na.
[12] Matigi, i kana ne jɛ i ka makari la. I ka ɲumaya ni i ka kantigiya ka to ka ne mara tuma bɛɛ.
[13] Ko jugu caman ye ne lamini, ne ka tilenbaliya kow ye ne kuru fo ka neɲɛ lafin. U ka ca ni ne kunsigi ye. Ne dusu tɛ lafiya si sɔrɔ.
[14] Matigi, i ka ne kisi. Matigi, i tɛliya ka ne dɛmɛ.
[15] Mɔgɔ minw b'a fɛ ka ne faga, olu ka maloya ka u lebu. Mɔgɔ minw bɛɛ bɛɲagali ne ka bɔnɛ kosɔn, olu ka segin kɔ ka bɔ da la.
[16] Minw b'a fɔ ne ma ko: «Payi, payi,» olu barika ka ban maloya kosɔn.
[17] Minw bɛɛ bɛ i ɲini, olu ka wasa ka ɲagali i la. Minw jigi bɛ i ka kisili kan, olu ka to k'a fɔ tuma bɛɛ ko: «Matigi ka tanu.»
[18] Ne ye faantan kɔlibaatɔ de ye, nka Matigi hakili bɛ ne la. I ye ne dɛmɛbaa ni ne tilabaa de ye. Ne ka Ala, i kana mɛn.