[1] Dawuda ka Zaburu. Matigi ka tanu, ne ka farakurun don. A bɛ ne bolo barika bonya kɛlɛ la, ka ne labɛn kɛlɛ kama.
[2] Ale ye ne dɛmɛbaa ni ne ka kɛlɛ kunbɛn so ye, ne marabaa ni ne tilabaa don. Ale ye ne ka nɛgɛ bɛnnan ni ne dogo yɔrɔ ye, ale de bɛ ne ka mɔgɔw kolo ne ye.
[3] Matigi, mɔgɔ ye mun ye fo i bɛ miiri a ko la? Hadamaden ye mun ye, fo i bɛ i janto a la?
[4] A bɛ i ko dafiɲɛ, a si tilew bɛɛ bɛ i ko ja tɛmɛntɔ.
[5] Matigi, i ka jigin ka bɔ sankolo la, ka maga kuluw la, u na sisi bɔ.
[6] I ka sanpɛrɛn kerun ka ne juguw jɛnsɛn, ka i ka biɲɛdenw ci ka u gɛn.
[7] I ka i bolo mɔɔnɔbɔ k'i to sankolo la, ka ne tila ka ne sama ka bɔ ji dunbaw kɔnɔ, ka ne tila ka bɔ jamana wɛrɛ denw bolo.
[8] U da bɛ nkalon tigɛ, u bɛ u kininbolo kɔrɔta nkalon kan.
[9] Ala, ne na dɔnkili kura da i ye, ne na tanuli dɔnkiliw da ni nkɔni juru tan ye.
[10] E de bɛ masakɛw tila, i ye i ka jɔnkɛ Dawuda tila mɔgɔ fagalaw ka npan na.
[11] I ka ne kisi ka ne bɔ jamana wɛrɛ denw bolo. U da bɛ nkalon tigɛ, u bɛ u kininbolo kɔrɔta nkalon kan.
[12] An denkɛw ka kɛ i ko jiri falennen kura minw bɛ bonya joona. An denmusow ka kɛ i ko samasen dɛsɛnen minw jɔlen bɛ masaya sow seleke la.
[13] An ka jiginɛw ka fa sumankisɛ sifa bɛɛ la. An ka sagaw ka jiidi ka kɛ waa caman ye, ka kɛ waa tan-tan caman ye an ka jamana kɔnɔ.
[14] An ka misiw ka jiidi. Bɔnɛ kana se an ma, an jugu si kana an cɛ. Kasikan si kana bɔ an ka dugu bɔlɔnw na.
[15] Ni siya min kɛra o cogo la, o ye dubaden ye. Matigi ye siya min ka Ala ye, o ye dubaden ye.