[1] Matigi, hakɛbɔbaa Ala, hakɛbɔbaa Ala, i ka i jira.
[2] Dugukolo kiritigɛbaa, i ka wuli. I ka kuncɛbaw sara ka kɛɲɛ ni u ka kɛwalew ye.
[3] Matigi, mɔgɔ juguw na to ka se sɔrɔ fo tuma jumɛn? Ɔwɔ, u na to ka se sɔrɔ fo tuma jumɛn?
[4] U bɛ kuma kosɛbɛ, u bɛ kuma ni kuncɛbaya ye, tilenbaliyakɛlaw bɛɛ bɛ u yɛrɛw bonya.
[5] Matigi, u bɛ i ka mɔgɔw cɔngɔ, ka i ka ciyɛn tɔɔrɔ.
[6] U bɛ muso cɛ salen ni siginfɛ faga, ka yatiimɛw faga.
[7] O kɔ, u b'a fɔ ko: «Matigi ɲɛ tɛ foyi la, Yakuba ka Ala tɛ kɔlɔsili kɛ.»
[8] Nalonmaw, a' ye aw yɛrɛw kɔlɔsi, hakilintanw, aw na hakili sɔrɔ tuma jumɛn?
[9] Min ye tulo di mɔgɔ ma, o tɛna mɛnni kɛ wa? Min ye ɲɛ dila, o tɛ yeli kɛ wa?
[10] Min bɛ siyaw kolo, ani min bɛ hakilitigiya di mɔgɔ ma, o tɛna u sara wa?
[11] Matigi bɛ mɔgɔw ka miiriliw dɔn, ko u ye fufafu de ye.
[12] Matigi, i bɛ mɔgɔ min kolo, ka i ka sariya jira a la,
[13] walisa i ka lafiya di a ma tɔɔrɔ waati la, sani dingɛba ka sen mɔgɔ juguw ye, o tigi ye dubaden ye.
[14] Matigi tɛna a ka mɔgɔw bila, a tɛna ban a ka ciyɛn na,
[15] k'a masɔrɔ kiri ni tilennenya naɲɔgɔn bɛn, mɔgɔ minw dusukun tilennen don, olu bɛɛ na ɲagali.
[16] Jɔn na wuli mɔgɔ juguw kama ne ye? Jɔn na fara ne kan tilenbaliya kɛbaaw kama?
[17] Ni Matigi tun ma ne dɛmɛ, ne ni tun na taa don yɔrɔ mankanntan na joona.
[18] Ni ne ko: «Ne sen bɛ cɛɛnɛ,» o tuma la Matigi, i ka ɲumaya kɛra ne sinsinnan ye.
[19] Ne dusukun na hami bonyara tuma min na, i ka dusu saaloli ye ne nisɔndiya kosɛbɛ.
[20] I bɛ se ka kɛ kiritigɛla tilenbali jɛɲɔgɔn ye cogo di, olu minw bɛ tilenbaliya kow kɛ sariya tɔgɔ la?
[21] U bɛɲɔgɔn lajɛ mɔgɔ tilennen fagali kama, ka mɔgɔ jalakibaliw joli bɔn.
[22] Nka Matigi ye ne marabaa ye, ne ka Ala ye ne dogo yɔrɔ farakurun ye.
[23] A na u ka juguya kow bi u yɛrɛw kan ka u halaki u ka jurumuw kosɔn. Ɔwɔ, Matigi, an ka Ala na u halaki.