[1] Aw ka Matigi tanu. Aw minw bɛ sankolow la, a' ye Matigi tanu, a' ye a tanu yɔrɔ kɔrɔtalenw na.
[2] Matigi ka mɛlɛkɛw bɛɛ ka a tanu. A ka kɛlɛbolow bɛɛ ka a tanu.
[3] Tile ni kalo, aw ka a tanu, dolo manamanataw bɛɛ, aw ka a tanu.
[4] Sankolow kun na sankolow ka a tanu, ani aw ji minw bɛ sankolow san fɛ.
[5] U bɛɛ ka Matigi tɔgɔ tanu, k'a masɔrɔ a ye ci fɔ, u dara.
[6] A ye u sigi ka u to yen badaa, ka sariya di u ma, o tɛ yɛlɛma.
[7] Dugukolo kan mɔgɔw, aw ka Matigi tanu, ani kɔgɔji kɔnɔ fɛnw ani yɔrɔ dunbaw bɛɛ,
[8] ani sanpɛrɛn ni sanbɛlɛnin ani neje ni bugun ani fiɲɛba min bɛ a kan minɛ,
[9] ani kuluw ni tintinw bɛɛ, ani jiri dentaw ni sedere sunw bɛɛ,
[10] kungo sogow ni bagan bɛɛ, ani fɛn fofotaw ni kɔnɔ pantaw,
[11] ani dugukolo kan masakɛw ani siyaw bɛɛ, ani faamaw ni dugukolo kan kiritigɛlaw bɛɛ,
[12] kamalenw ni npogotigiw, mɔgɔ kɔrɔw ni denmisɛnw.
[13] Olu bɛɛ ka barika da Matigi ye, k'a masɔrɔ ale kelenpe tɔgɔ ka bon, a nɔɔrɔ bɛ dugukolo ni sankolo san fɛ.
[14] A y'a ka mɔgɔw barika bonya, walisa a ka senumaw bɛɛ ka a tanu, a ka mɔgɔw Israɛl bɔnsɔn ko don, olu minw ka surun a la. Aw ka Matigi tanu.