[1] Dawuda ka Sigaion, a ye o dɔnkili da Matigi ye Benjamɛn bɔnsɔn Kus ka kuma ko la.
[2] Matigi, ne ka Ala, ne bɛ ne kalifa i ma. Ne tila ne nɔgɛnbaaw bɛɛ la ka ne kisi,
[3] walisa ne juguw kana ne farafara i ko waraba. U kana ne farafara i ko tilabaa tɛ ne la.
[4] Matigi, ne ka Ala, ni ne jalakilen don, ni ne bolo ye tilenbaliya ko kɛ,
[5] ne ni mɔgɔ min tun bɛɲɔgɔn fɛ hɛrɛ la, ni ne ye ko jugu kɛ o la, mɔgɔ min ye ne tɔɔrɔ ni sababu t'a la, ni ne ye o bolo fɛnw cɛ,
[6] o tuma la ne jugu ka tugu ne nɔ fɛ ka ne minɛ, ka ne cɔngɔ a sen kɔrɔ, ka ne nɔɔrɔ don buguri la. Sela.
[7] Matigi, i diminnenba ka wuli, i ka wuli ne tɔɔrɔbaaw kama. I ka kunun ka ne dɛmɛ, i ye kiri ko labɛn ka ban.
[8] Siyaw jamaba ka lajɛ ka i lamini, i ka yɛlɛn ka taa sigi olu san fɛ yɔrɔ kɔrɔtalen na.
[9] Matigi bɛ kiri tigɛ siyaw bɛɛ kan. Matigi, i ka ne kɛ tilennen ye, ka kɛɲɛ ni ne ka tilennenya ni ne ka jɛlenya ye.
[10] I ka mɔgɔ jugu ka dabaliw ban, nka i ka mɔgɔ tilennen sabati, katuguni e Ala tilennen, i bɛ mɔgɔ dusukun ni a kɔnɔna kow sɛgɛsɛgɛ.
[11] Ala ye ne ka nɛgɛ bɛnnan ye, a bɛ mɔgɔ dusu tilennen kisi.
[12] Ala ye kiritigɛla tilennen de ye, a bɛ dimin don o don.
[13] Ni mɔgɔ tɛ nimisa, Ala bɛ a ka npan da diya, a bɛ a ka kala sama ka sumani kɛ.
[14] A bɛ a labɛn mɔgɔ faga kɛlɛkɛ minanw na, a bɛ a labɛn ni biɲɛkisɛ tasumamaw ye.
[15] A filɛ, mɔgɔ jugu bɛ kɔnɔ ta ka ko jugu bange, a bɛ tilenbaliya kɔnɔ ta ka nkalon bange.
[16] A bɛ dingɛ dunba sen, nka a bɛ bi a yɛrɛ ka dingɛ sennen kɔnɔ.
[17] A ka juguya bɛ segin a yɛrɛ kun, a ka fariya ko bɛ bi a yɛrɛ kun na.
[18] Ne na barika da Matigi ye a ka tilennenya kosɔn. Ne na tanuli dɔnkili da Matigi Kɔrɔtalenba tɔgɔ la.