[1] Dɔnkili dalaw kuntigi ka dɔnkili. Korɛ denkɛw ka kalan dɔnkili.
[2] Ne ka Ala, kungo sogo bɛ folo kɔji nɔ fɛ cogo min na, ne dusukun bɛ folo e nɔ fɛ o cogo la.
[3] Ala nege bɛ ne ni la, Ala ɲɛnama kɔni. Ne na don ka ne jɔ a ɲɛ kɔrɔ tuma jumɛn?
[4] Ne ɲɛji kɛra ne ka dumuni ye su fara tile kan, sabu u bɛ to k'a fɔ ne ye tuma bɛɛ ko: «I ka Ala bɛ min?»
[5] Ne hakili jiginna a la tuma min na, ko ne taamana jamaba fɛ, ka taama u ɲɛ fɛ fo ka se Ala ka so ma, ne dusuɲɔɲɔna o miirili fɛ. Ne ye jamaba dama dɔnbaliɲagalikan ni u dɔnkili dakan mɛn. Jamaba ye seli kɛ o don na.
[6] Ne dusu, mun y'a to i jigi tigɛra ka nwunan ne kɔnɔ? I jigi da Ala kan, katuguni ne na a tanu ko kura. Ale de ye ne kisibaa ni ne ka Ala ye.
[7] Ne ka Ala, ne dusu bɛ nwunan ne kɔnɔ. O de kosɔn ne bɛ miiri i ko la, ka ne to Jurdɛn jamana la ani Hermɔn kuluw ni Mizear tintinw kan.
[8] Ji dunba bɛ ji dunba dɔ wele i ka jikan fununfununkan kosɔn, i ka jikuru misɛnw ni i ka jikurubaw bɛɛ ye ne tunun.
[9] Matigi ka nɛɛma bɛ kɛ ne kan tile fɛ, ne da bɛ a tanu su fɛ. Ne bɛ ne kaɲɛnamayatigi Ala deli.
[10] Ne b'a fɔ, ne ka Ala, ne ka farakurun ye ko: «Mun kosɔn i ɲinɛna ne kɔ? Mun kosɔn ne ɲɛnasisilen ni ne ɲɛji bɔtɔ bɛ taama ne juguw ka tɔɔrɔ fɛ?
[11] A bɛ i n'a fɔ ne kolow karilen don ne tɔɔrɔbaaw ka mafiɲɛyali kosɔn, sabu u b'a fɔ ne ye don o don ko: ‹I ka Ala bɛ min?›»
[12] Ne dusu, mun y'a to i jigi tigɛra ka nwunan ne kɔnɔ? I jigi da Ala kan, katuguni ne na a tanu ko kura. Ale de ye ne kisibaa ni ne ka Ala ye.