[1] Dɔnkili dalaw kuntigi ka dɔnkili min dara gitit la. Asaf ka Zaburu.
[2] A' ye dɔnkili da Ala ye niɲagali ye, ale de ye an barika ye. Aw ka ɲagalikanba bɔ ka Yakuba ka Ala bonya.
[3] A' ye dɔnkili da ni dununkan ni nkɔnikan duman ani npɔlɔnkan ye.
[4] Aw ka buru fyɛ kalo kura la ka a fyɛ kalo jɛ tuma la an ka seli don na.
[5] K'a masɔrɔ o ye sariya ye Israɛl bɔnsɔn ye, Yakuba ka Ala ka ci fɔlen don.
[6] O ye a ka laada sigilen ye Yusufu denkɛw ye, a ye Misira jamana kɛlɛ tuma min na. Ne ye kan dɔ mɛn, ne ma min dɔn, o y'a fɔ ne ye ko:
[7] «Ne ye doni jigin ka bɔ a kamankun na, a bolow bɔra segi la.
[8] I kasira i ka tɔɔrɔ waati la, ne ye i kisi, ka i ka deliliw lamɛn, ka ne to sanpɛrɛnw cɛma. Ne ye i kɔrɔbɔ Mɛriba ji yɔrɔ la. Sela.
[9] Ne ka mɔgɔw, a' ye ne lamɛn, ne na aw kalan. E Israɛl, ni i bɛ sɔn ka ne kan lamɛn,
[10] siya wɛrɛ ka bato fɛn kana sɔrɔ i cɛma, i kana i biri jamana wɛrɛ ka bato fɛnw kɔrɔ.
[11] Ne ye Matigi, i ka Ala ye. Ne ye i labɔ Misira jamana la. I ka i da yɛlɛ, ne na i fa.
[12] Nka ne ka mɔgɔw ma ne kan lamɛn, Israɛl bɔnsɔn ma sɔn ka ne kan minɛ.
[13] O tuma la ne ye u to u dusukun fililen bolo, u taamana u yɛrɛw sagona siraw fɛ.
[14] Nka ni ne ka mɔgɔw tun sɔnna ka ne kan lamɛn, ni Israɛl bɔnsɔn tun sɔnna ka ne ka siraw taama,
[15] ne tun na u juguw kolo joona, ne tun na ne bolo se u juguw ma.
[16] Matigi koniyabaaw tun na kolo a ye u da la, o tuma la Israɛl bɔnsɔn tun na kɛ hɛrɛ la tuma bɛɛ.
[17] Ne tun na u balo ni alikama bɛɛ laɲuman ye, ka di bɔ fara kolo la ka u wasa ni o ye.»