[1] bonya kana da an kan, Matigi, a kana da an kan, nka i ka bonya da i yɛrɛ tɔgɔ kan, i ka makari ni i ka kantigiya kosɔn.
[2] Mun kosɔn siyaw b'a fɔ ko: «U ka Ala bɛ min?»
[3] Nka an ka Ala bɛ sankolo la, min ka di a ye, a bɛ o de kɛ.
[4] Siyaw ka boliw dilara ni warijɛ ni sanu ye, Hadamaden bolo baara nɔ don.
[5] Da bɛ u la, nka u tɛ kuma, ɲɛ bɛ u la, nka u tɛ yeli kɛ.
[6] Tulo bɛ u la, nka u tɛ mɛnni kɛ, nun bɛ u la, nka u tɛ fɛn si suma mɛn.
[7] Bolo bɛ u la, nka u tɛ se ka fɛn minɛ. Sen bɛ u la, nka u tɛ se ka taama, u ngɔnɔ tɛ mankan si bɔ.
[8] U dilabaaw ani minw bɛ u jigi da u kan, olu ka kɛ i ko u cogo.
[9] Israɛl, i jigi da Matigi kan, ale de ye i dɛmɛbaa ni i ka nɛgɛ bɛnnan ye.
[10] Aron ka so, a' ye aw jigi da Matigi kan, ale de ye aw dɛmɛbaa ni aw ka nɛgɛ bɛnnan ye.
[11] Matigi ɲɛsiranbaaw, a' ye aw jigi da Matigi kan. Ale de ye aw dɛmɛbaa ni aw ka nɛgɛ bɛnnan ye.
[12] Matigi y'a janto an na ka duba an ye. Ɔwɔ, a na duba Israɛl ka so ye, ka duba Aron ka so ye.
[13] Matigi na duba a ɲɛsiranbaaw bɛɛ ye, mɔgɔ misɛnw ni mɔgɔbaw.
[14] Matigi na aw jiidi, aw ni aw denw.
[15] Aw ye Matigi ka dubadenw ye, o min ye sankolo ni dugukolo da.
[16] Sankolow ye Matigi ta ye, nka a ye dugukolo di Hadamadenw ma.
[17] Mɔgɔ salenw tɛna Matigi tanu, minw bɛ jigin ka taa yɔrɔ mankanntan na, olu si tɛna a tanu.
[18] Nka an na Matigi tanu kabini sisan fo badaa. Aw ka Matigi tanu.