[1] Dɔnkili dalaw kuntigi ka dɔnkili. Dawuda ka Zaburu.
[2] Sankolow bɛ Ala nɔɔrɔ lakali, sankolo furancɛw bɛ a bolo baara nɔ jira.
[3] Tile dɔ bɛ kalan di tile dɔ wɛrɛ ma, su dɔ bɛ a dɔnniya jira su dɔ wɛrɛ la.
[4] O tɛ kɛ ni kanw ye, o tɛ kɛ ni kumakanw ye. Mɔgɔ si tulo tɛ u kan mɛn.
[5] O bɛɛ n'a ta u ka kalan bɛ se dugukolo yɔrɔw bɛɛ ma, u ka kuma bɛ taa se fo diɲɛ dan na. Ala ye sankolo kɛ tile ka so ye.
[6] Tile bɛ i ko kɔɲɔcɛ min bɔtɔ don a siyɔrɔ la. A nisɔndiyalen don i ko cɛ barikama bɛ nisɔndiya ɲɔgɔn dan boli la cogo min na.
[7] A bɛ bɔ sankolo kun dɔ la ka munumunu ka taa bi a kun dɔ la. Fɛn si tɛ se k'i dogo a funteniɲɛ.
[8] Matigi ka sariya dafalen bɛ, a bɛ mɔgɔ ni kuraya. Matigi ka kalanw ye tiɲɛ de ye, u bɛ hakilitigiya di mɔgɔ ko dɔnbali ma.
[9] Matigi ka ko latigɛlenw ye tiɲɛ ye, u bɛ mɔgɔ dusukunɲagali. Matigi ka ci fɔlenw ye kɛnɛyeelen de ye, u bɛ yeelen bɔ mɔgɔɲɛw ye.
[10] Matigi ɲɛsiran jɛlen don, a bɛ to badaa. Matigi ka kiri kow ye tiɲɛ de ye, u bɛɛ tilennen don.
[11] U ka fisa sanu ye, hali ka tɛmɛn sanu yɛrɛwolo kan. U ka timi ka tɛmɛn di kan, hali ka tɛmɛn dinɔɔnɔ kan.
[12] I ka jɔn bɛ lasɔmi u fɛ fana. Barajiba bɛ u marali la.
[13] Mɔgɔ jumɛn bɛ a yɛrɛ ka fililiw dɔn? Ne ye filili minw kɛ, i ka olu yafa ne ma.
[14] I ka i ka baaraden mara kuncɛbaya kow fana ma, ne kana kɛ u ka jɔn ye. O tuma la ne jalakibali jɛlen na sɔrɔ hakɛ kow bɛɛ ma.
[15] Ne dala kumaw ani ne dusukun na miiriliw ka diya i ye, Matigi, ne ka farakurun ni ne kunmabɔbaa.