[1] Solomani ka Zaburu. Ala, i ka masakɛ kalan, walisa a ka kiri tigɛ ka kɛɲɛ ni i ka tilennenya ye ka i ka tilennenya di masakɛ denkɛ ma,
[2] walisa a ka kiri tigɛ i ka mɔgɔw kan ni tilennenya ye, ka kiri tigɛ faantanw kan ni tiɲɛ ye.
[3] Kuluw na hɛrɛ kɛ mɔgɔw ye, tintinw fana na a kɛ i ka tilennenya kosɔn.
[4] A na jo di a ka mɔgɔ tɔɔrɔlenw ma ka faantan denw kisi, ka u tɔɔrɔbaaw cɔngɔ a sen kɔrɔ.
[5] Ka tile ni kalo to sankolo la, mɔgɔw na siran i ɲɛ, bɔnsɔn nataw bɛɛ na siran i ɲɛ.
[6] Masakɛ na kɛ i ko sanji min bɛ bi bin nugu kan. A na kɛ i ko sanji musumusu min bɛ dugukolo suma.
[7] Mɔgɔ tilennenw na jiidi a ka masaya la, ka kalo to yeelen bɔli la, hɛrɛba na kɛ a ka mɔgɔw ye.
[8] A na sigi fɛn bɛɛ kun na k'a daminɛ kɔgɔji dɔ la fo ka taa bila dɔ wɛrɛ ma, ka bɔ Ufrate ba la fo ka taa se dugukolo dan na.
[9] Kungokolon kɔnɔ mɔgɔw na u biri a ɲɛ kɔrɔ, a juguw na buguri lanɔn.
[10] Tarsisi masakɛw ni gunw masakɛw na bonya fɛnw di a ma, Seba ni Saba masakɛw na taa nili fɛnw di a ma.
[11] Masakɛw bɛɛ na u biri a ɲɛ kɔrɔ, siyaw bɛɛ na baara kɛ a ye.
[12] K'a masɔrɔ a na mɔgɔ tɔɔrɔlen kasibaatɔ tila, ani dɛmɛbaa tɛ faantan minw na.
[13] A na hinɛ barika dɛsɛlenw niɲɛnibaatɔw la, ka mɔgɔ tɔɔrɔlenw ni kisi.
[14] A na u ni kunmabɔ ka bɔ degun ni fariya la. U joli na kɛ fɛn sɔngɔ gɛlɛn ye a ɲɛ na.
[15] Masakɛ ka si sɔrɔ, u ka Seba sanu di a ma. U ka Ala deli a ye tuma bɛɛ, k'a tanu don o don.
[16] Sɛnɛ fɛnw ka caya o jamana kɔnɔ fo ka se kuluw san fɛ. U tinsanw ka bonya i ko Liban sedere sunw. Dugu kɔnɔ mɔgɔw ka caya i ko dugukolo kan bin.
[17] A tɔgɔ ka to badaa, a tɔgɔ ka mɛn i ko sankolo la tile. Mɔgɔw ka duba sɔrɔ a kosɔn, siyaw bɛɛ ka a wele dubaden.
[18] Matigi Ala, Israɛl ka Ala ka tanu, ale kelenpe bɛ kɛwale kabakomaw kɛ.
[19] A tɔgɔ nɔɔrɔma ka tanu badaa. Dugukolo bɛɛ ka fa a nɔɔrɔ la. Amiina, amiina.
[20] Isayi denkɛ Dawuda ka deliliw laban.