[1] Aw ka barika da Matigi ye, k'a masɔrɔ a ka ɲi, a ka makari bɛ to badaa.
[2] Israɛl k'a fɔ ko: «Ɔwɔ, a ka makari bɛ to badaa.»
[3] Aron ka so k'a fɔ ko: «A ka makari bɛ to badaa.»
[4] Matigi ɲɛsiranbaaw k'a fɔ ko: «A ka makari bɛ to badaa.»
[5] Ka ne tɔɔrɔlen to, ne ye Matigi tɔgɔ wele, a ye ne lamɛn ka ne hɔrɔnya.
[6] Matigi bɛ ne fɛ, ne tɛna siran foyiɲɛ, mɔgɔ bɛ se ka mun kɛ ne la?
[7] Matigi bɛ ne fɛ, a bɛ ne dɛmɛbaaw cɛma, ne na ne juguw tɔɔrɔ ko ye.
[8] Ka i kalifa Matigi ma, o ka fisa i jigi dali ye Hadamaden kan.
[9] Ka i kalifa Matigi ma, o ka fisa ni i jigi dali ye faamaw kan.
[10] Siyaw bɛɛ ye ne lamini, ne ye se sɔrɔ u kan Matigi barika la.
[11] Ɔwɔ, u ye ne lamini ka ne degun ne fan bɛɛ la, ne ye se sɔrɔ u kan Matigi barika la.
[12] U ye ne lamini i ko dikisɛw, nka u jenina i ko tasuma bɛ bin jalen jeni cogo min na. Ne ye se sɔrɔ u kan Matigi barika la.
[13] Ne juguw bira ne kan ko u bɛ ne bi, nka Matigi ye ne dɛmɛ.
[14] Matigi ye ne barika ni ne ka tanuli sababu ye, ale de ye ne kisi.
[15] Se sɔrɔli mankan bɛ bɔ mɔgɔ tilennenw ka finisow kɔnɔ, Matigi kininbolo ye kobaw kɛ.
[16] Matigi kininbolo kɔrɔtalen bɛ, Matigi kininbolo ye kobaw kɛ.
[17] Ne tɛna sa, nka ne ɲɛnama na to, ka Matigi ka kɛwalew lakali.
[18] Tiɲɛ la, Matigi ye ne gosi kosɛbɛ, nka a ma ne faga.
[19] Aw ka tilennenya donda la konw dayɛlɛ ne ye, ne na don u fɛ ka barika da Matigi ye.
[20] Matigi ka da filɛ, mɔgɔ tilennenw na don o fɛ.
[21] Ne na barika da i ye, k'a masɔrɔ i ye ne jaabi, i ye ne tilabaa ye.
[22] So jɔlaw banna kabakurun min na, o kɛra so seleke la kaba ye.
[23] O ye kabako ye anɲɛ na, nka Matigi de ye o kɛ.
[24] Matigi ye don min latigɛ, o filɛ nin ye, an na ɲagali ka nisɔndiya dɔnkili da a ye.
[25] Matigi, i ka an kisi, Matigi, i ka an ka kɛtaw yiriwa.
[26] Min natɔ filɛ Matigi tɔgɔ la, o ye dubaden ye. An na duba ta aw ye k'an to Matigi ka so kɔnɔ.
[27] Matigi ye Ala barikama ye, a ye kɛnɛ bɔ an ye. Aw ka saraka siri ni jurukisɛw ye ka taa o siri saraka bɔlan biɲɛkolow la.
[28] I ye ne ka Ala ye, ne na barika da i ye. I ye ne ka Ala ye, ne na i tanu.
[29] Aw ka barika da Matigi ye k'a masɔrɔ a ka ɲi, a ka makari bɛ to badaa.