[1] Dawuda ka Zaburu. Dawuda y'a yɛrɛ kɛ fatɔ ye Abimelɛk ɲɛ na tuma min na, o y'a gɛn, a taara.
[2] Ne bɛ barika da Matigi ye tuma bɛɛ. Ne da na a tanuli dɔnkili da tuma bɛɛ.
[3] Matigi ye ne yɛrɛ bonya sababu ye. Mɔgɔ majiginlen na o mɛn ka ɲagali.
[4] Ɔwɔ, an ka jɛ ka Matigi tanu. An bɛɛ k'a tɔgɔ fɔɲɔgɔn fɛ.
[5] Ne ye Matigi ɲini, a ye ne jaabi, ka ne tila ne siran kow bɛɛ la.
[6] Mɔgɔ minw bɛ u ɲɛ sin Matigi ma, olu ɲɛda bɛ manamana ɲagali fɛ. U tɛna maloya.
[7] Faantan kasira, Matigi y'a kan lamɛn, k'a tila ka bɔ a tɔɔrɔ kow bɛɛ la.
[8] Matigi ka mɛlɛkɛ bɛ daga ka a ɲɛsiranbaaw lamini, ka u kisi tɔɔrɔ ma.
[9] Aw ka Matigi sifilɛ k'a dɔn ko a ka ɲi. Mɔgɔ minw bɛ u kalifa ale ma, olu ye dubadenw ye.
[10] Matigi ka senumaw, aw ka siran a ɲɛ, k'a masɔrɔ a ɲɛsiranbaaw tɛna dɛsɛ foyi la.
[11] Warabadenw bɛ kɔli, kɔngɔ bɛ u minɛ, nka Matigi ɲinibaaw tɛna dɛsɛ fɛnɲuman si la.
[12] Denmisɛnw, a' ye na ka ne lamɛn, ne na aw kalan Matigi ɲɛsiran na.
[13] Diɲɛ latigɛɲuman ka di mɔgɔ jumɛn ye? Mɔgɔ jumɛn b'a fɛ ka si tile caman sɔrɔ walisa a ka hɛrɛ ye?
[14] O tigi ka a nɛnkun kɔlɔsi ko jugu fɔli ma, k'a dawolo kɔlɔsi nanbara kuma ma.
[15] I ka fara ko jugu la ka ko ɲuman kɛ, ka hɛrɛ ɲini ka tugu a nɔ fɛ.
[16] Matigi ɲɛ bɛ mɔgɔ tilennenw na, a b'a tulo majɔ u kasikan na.
[17] Matigi ɲɛda bɛ kojugukɛlaw kɛlɛ, ka u nɔ jɔsi ka bɔ dugukolo kan.
[18] Ni mɔgɔ tilennenw kasira, Matigi bɛ u lamɛn, ka u tila u degun kow bɛɛ la.
[19] Matigi ka surun mɔgɔ dusu kasilenw na, a bɛ mɔgɔ dusu nimisibaatɔ kisi.
[20] Mɔgɔ tilennen degun kow ka ca, nka Matigi b'a tila u bɛɛ la.
[21] A b'a kolow bɛɛ mara, walisa a kolow si tɛna kari.
[22] Juguya na mɔgɔ jugu faga, mɔgɔ tilennen koniyabaaw na ɲankata.
[23] Matigi bɛ a ka baaradenw ni kunmabɔ, minw bɛɛ bɛ u yɛrɛw kalifa a ma, olu si tɛna jalaki.