[1] Dawuda ka Zaburu. Matigi, ne bɛ kasi i nɔ fɛ. Ne ka farakurun, i kana i tulo datugu ne ka delilikan na. Ni i ma sɔn ka ne jaabi, ne na kɛ i ko mɔgɔ minw bɛ taa dingɛba kɔnɔ.
[2] Ni ne bɛ kasi i nɔ fɛ ka ne bolow kɔrɔta i batosoba senuma fan fɛ tuma min na, i ka ne ka delilibaw lamɛn.
[3] I kana ne ni mɔgɔ juguw ni tilenbaliyakɛlaw dama kɛɲɛ, olu minw bɛ hɛrɛ ko fɔ u mɔgɔɲɔgɔn ye ka juguya to u dusukunw na.
[4] I ka u sara ka kɛɲɛ ni u ka kɛwalew ni u ka juguya ye. I ka u sara ka kɛɲɛ ni u bolow ka kɛwalew ye. U bɛ miiri min na, i ka o kɛ u la.
[5] K'a masɔrɔ u tɛ u janto Matigi ka kɛwalew ni a bolo baara nɔw la, o de kosɔn a na u halaki, a tɛna u lawuli tun.
[6] Matigi ka tanu, katuguni a ye ne ka delilibaw lamɛn.
[7] Matigi ye ne barika ni ne ka nɛgɛ bɛnnan ye. Ne dusukun kalifara a ma, ne lakanalen don. Ne dusukunɲagalilenba don fana. Ne bɛ Matigi tanu ni dɔnkiliw ye.
[8] Matigi ye a ka mɔgɔw barika ye, ale ye a kaɲɛnatɔmɔlen ka kɛlɛ kunbɛn so ye.
[9] I ka i ka mɔgɔw kisi ka duba i ka ciyɛn ye. I ka kɛ u kɔlɔsibaa ye ka u mara badaa.