[1] Dawuda ka Zabaru. Matigi, ne bɛ i deli, i tɛliya ka na ne dɛmɛ. Ni ne kasira i nɔ fɛ, i ka ne kan lamɛn.
[2] Ne ka delili ka diya i ye i ko wusulan suma duman, ne bolo kɔrɔtalen i fan fɛ ka kɛ i ko wula da fɛ saraka.
[3] Matigi, i ka ne da kɔlɔsi, i ka ne dawolo mara.
[4] I kana sɔn ne dusukun ka taa ko jugu nɔ fɛ, a kana ko jugu kɛ tilenbaliya kɛbaaw fɛ. Ne kana niyɔrɔ si sɔrɔ u ka seli dumuni la.
[5] Mɔgɔ tilennen ka ne gosi, o ye ne ka hɛrɛ ye, ni a ye ne kɔrɔfɔ, o na kɛ tulu ye ne kun na. Ne kun tɛna ban o ma, nka ne na to delili la u ka ko jugu kama.
[6] Ni u ka kiritigɛlaw bɔra ka bi fara kan, o tuma la u bɛɛ na ne ka kumaw lamɛn k'a masɔrɔ olu ka di.
[7] Misidaba bɛ dugukolo yuguba cogo min na, an kolow jɛnsɛnna kaburu donda la o cogo la.
[8] Ne bɛ neɲɛ jɔ e Matigi Ala de la, ka i kɛ ne dogo yɔrɔ ye, i ka ne ɲɛnama to.
[9] U ye jan minw da ne ye, i ka ne kisi olu ma, ka ne kisi tilenbaliya kɛbaaw ka jɔ dogolenw ma.
[10] Mɔgɔ juguw ka bi u yɛrɛw ka minɛli jɔw kɔnɔ, k'a sɔrɔ ne bɛ kisi u ma.