[1] Ala ka cɛ Musa ka delili. Matigi, i kɛra an dogo yɔrɔ ye tuma bɛɛ.
[2] Sani kuluw ka da, sani dugukolo ni a kan fɛnw ka da, kabini fɔlɔfɔlɔ i ye Ala ye, i na to badaa.
[3] I bɛ mɔgɔ kɔsegin buguri la, k'a fɔ ko: «Hadamadenw, a' ye kɔsegin dugukolo la.»
[4] K'a masɔrɔ san waa kelen bɛ i ɲɛ na i ko kunun tɛmɛnna, i ko su fɛ kɔlɔsilikɛlaw ka waati kelen.
[5] I bɛ u ta, u bɛ kɛ i ko sugo dara u la, u bɛ i ko bin min falenna sɔgɔma da fɛ.
[6] A bɛ feere bɔ sɔgɔma da fɛ ka tɛmɛn. A bɛ tigɛ wula fɛ, a bɛ ja.
[7] An jenina i ka dimiya fɛ, ka ban i ka dusu bɔ fɛ.
[8] I ye an ka tilenbaliya kow bila i ɲɛ kɔrɔ, ka an ka filili dogolenw bila i ɲɛda kɛnɛ la.
[9] An si tilew bɛ surunya i ka dimiya kosɔn, an bɛ ban i ko dafiɲɛ.
[10] An si tilew bɛ se ka mɛn ka san biwolonwula bɔ, ni mɔgɔ min barika ka bon, a bɛ se ka san bisegin sɔrɔ. O de y'a to u ka yɛrɛ bonya tɛ foyi ye sɛgɛn ni bɔnɛ kɔ. Diɲɛ latigɛ bɛ ban joona, an bɛɛ bɛ fura ka ta.
[11] Jɔn bɛ i ka dimiyaba dan dɔn? I ka dimiya bɛ siran min bila mɔgɔ dusu la, jɔn bɛ o dan dɔn?
[12] I ka an kalan an si tilew jateli la walisa an ka dusukun hakiliman sɔrɔ.
[13] Matigi, i na kɔsegin an ma tuma jumɛn? I ka makari i ka jɔnw na.
[14] I ka an fa ni i barika ye sɔgɔma da fɛ, an na nisɔndiya ka ɲagali an si tile bɛɛ la.
[15] An ye o san minw kɛ tɔɔrɔ la, i ka ɲagali waati di an ma ka kɛɲɛ ni olu ye.
[16] I ka i ka sebaaya yɛrɛkɛ i ka jɔnw ɲɛ kɔrɔ, i nɔɔrɔ ka kɛnɛ bɔ u denw ye.
[17] Matigi an ka Ala, i ka duba ka da an kan, ka an bolo baara nɔ sabati. Ɔwɔ, i ka an bolo baara nɔ sabati.