[1] Dɔnkili dalaw kuntigi ka dɔnkili. Korɛ denkɛw ka Zaburu.
[2] Matigi, i sɔnna i ka jamana ka hɛrɛ ma, i ye Yakuba bɔnsɔn kɔsegin ka bɔ jɔnya la.
[3] I ye i ka mɔgɔw ka tilenbaliya kow yafa u ma, ka u ka jurumuw bɛɛ yafa. Sela.
[4] I ye i ka dimiya bɛɛ mada, ka i ka dusubɔ ko dabila.
[5] An Kisibaa Ala, i ka an lawuli, ka i ka dimiya dabila an ko la.
[6] I diminnen na to an kɔrɔ badaa wa? I ka dimiya na mɛn fo ka taa se bɔnsɔn nataw bɛɛ ma wa?
[7] I tɛna anɲɛnamaya tun walisa i ka mɔgɔw ka ɲagali i la wa?
[8] Matigi, i ka i ka nɛɛma kɛ an ye, ka i ka kisili di an ma.
[9] Matigi Ala bɛ min fɔ, ne na o lamɛn, k'a masɔrɔ a bɛ kuma a ka mɔgɔw, a ka kanulenw ka hɛrɛ ko la, nka u kana kɔsegin u ka hakilintanya kow ma tun.
[10] Tiɲɛ la, a ka kisili ka surun a ɲɛsiranbaaw la, walisa nɔɔrɔ ka sigi an ka jamana kɔnɔ.
[11] Ɲumaya ni tiɲɛ ye ɲɔgɔn kunbɛn, tilennenya ni hɛrɛ ye ɲɔgɔn minɛ.
[12] Tiɲɛ bɛ falen ka bɔ dugukolo la, tilennenya na bɔ san fɛ ka jigin dugukolo kan.
[13] Matigi na a ka fɛnɲumanw di, an ka dugukolo na den kɛ.
[14] Tilennenya na taama a ɲɛ fɛ, ka sira labɛn a ɲɛ.