[1] Dɔnkili dalaw kuntigi ka dɔnkili baga feerew ko la. Dawuda ka Zaburu.
[2] Ala, i ka ne kisi, k'a masɔrɔ ji bɛ ɲini ka ne tunun.
[3] Ne jiginna bɔrɔgɔ la, hali sen da yɔrɔ tɛ yen. Ne jiginna ji dun na, jikuru tɛmɛnna ne kun na.
[4] Ne kulola fo ka ne ngɔnɔ ja, neɲɛ sɛgɛnna ne ka Ala makɔnɔli la.
[5] Minw bɛ ne koniya ni kun t'a la, olu ka ca ni ne kunsigi dama ye. Ne jugu minw b'a fɛ ka ne faga, olu barika ka bon. Ne ma min ta, u ko, ne ka o di u ma.
[6] Ala, i bɛ ne ka hakilintanya dɔn, ne ka fililiw ma dogo i la.
[7] Matigi Kɛlɛbolowtigi Ala, i makɔnɔbaaw kana maloya ne kosɔn. Israɛl ka Ala, i ɲinibaaw kana maloya ne kosɔn.
[8] K'a masɔrɔ ne ye nenili muɲu i kosɔn, fo maloya ye ne kunkolo funun.
[9] Ne kɛra dunan ye ne balimaw fɛ. Ne badenw ye ne jate siya wɛrɛ mɔgɔ ye,
[10] k'a masɔrɔ i ka so hami ye ne minɛ, i mafiɲɛyabaaw ka mafiɲɛyaliw bira ne kan.
[11] Ne kasira ka sun don, u ye ne mafiɲɛya o kosɔn.
[12] Ne ye cafu fini don ne kan na tuma min na, ne kɛra yɛlɛbɔ fɛn ye u fɛ.
[13] Minw sigilen bɛ dugu donda la, olu bɛ baro kɛ ne ko la. Dɔlɔtɔw bɛ ne tɔgɔ don u ka dɔnkili la.
[14] Nka ne bɛ i deli, Matigi, waati bɛnnen filɛ nin ye. Ala, i ka ne jaabi ka ne dɛmɛ i ka kantigiya kosɔn, i ka ɲumaya barika la.
[15] I ka ne sama ka bɔ bɔrɔgɔ la, i kana sɔn ne ka jigin a kɔnɔ tun. I ka ne kisi ne juguw ni ji dunba ma.
[16] I kana sɔn jikuru ka ne datugu, ji dunba kana ne tunun, halaki dingɛ dibi kana datugu ne da la.
[17] Matigi, i ka ne jaabi, k'a masɔrɔ i ka makari ka bon. I ka i ɲɛ yɛlɛma ka ne filɛ, i ka kanuyaba kosɔn.
[18] I kana i ɲɛda dogo i ka jɔn na. Ne bɛ tɔɔrɔba la, i ka ne jaabi joona.
[19] I madon ne la ka ne kisi, ne kisi ne juguw ma.
[20] I bɛ ne ka nenili ni maloya ani mafiɲɛyali dɔn. I ɲɛ bɛ ne tɔɔrɔbaaw bɛɛ la.
[21] U ka mafiɲɛyali ye ne dusu kasi fo ka ne bana. Ne tun bɛ hinɛtigi makɔnɔ, nka hinɛtigi tun tɛ yen. Ne ye dusu saalobaa ɲini, nka ne ma o sɔrɔ.
[22] Ne juguw ye fɛn kunama kɛ ne ka dumuni la, minnɔgɔ tun bɛ ne la, u ye diwɛn kumu di ne ma.
[23] U ka dumuni tabali ka kɛ u minɛli jan ye, a ka kɛ u minɛ sababu ye ka u to hɛrɛ la.
[24] U ɲɛw ka lafin fo u tɛ se ka kɛnɛ ye, u kɔw ka kuru tuma bɛɛ.
[25] I ka i ka dimiya bi u kan, i dusu bɔlenba ka tugu u nɔ fɛ ka kun u la.
[26] U sigi sow ka kɛ tomon ye, mɔgɔ si kana sigi u ka finisow kɔnɔ,
[27] k'a masɔrɔ i ye min gosi, u bɛ o tɔɔrɔ, i ye min jogin, u bɛ o ko lakali.
[28] Ko jugu ka fara u ka ko jugu kan, u niyɔrɔ si kana sɔrɔ i ka kisili la.
[29] U tɔgɔw ka jɔsi ka bɔɲɛnamaya kitabu kɔnɔ, u tɔgɔ kana sɛbɛn mɔgɔ tilennenw cɛma.
[30] Ne kɔni, ne ye faantan tɔɔrɔlen de ye. Ala, i ka ne dɛmɛ ka ne sigi san fɛ.
[31] Ne na Ala tɔgɔ tanu ne ka dɔnkiliw la, ne na barika da a ye ni ne ka kɛwalew ye.
[32] O na diya Matigi ye kosɛbɛ ka tɛmɛn saraka kan, ka tɛmɛn ntura biɲɛkoloma ntɔrɔnma saraka kan.
[33] Mɔgɔ majiginnen na ne ka kisili ye ka ɲagali. Aw minw bɛ Ala ɲini, aw dusukun ka kuraya,
[34] k'a masɔrɔ Matigi bɛ mɔgɔɲɛnibaatɔw kan lamɛn, a tɛɲinɛ a ka mɔgɔw kɔ ka u to kaso la.
[35] Sankolo ni dugukolo ka a tanu ani kɔgɔji ni a kɔnɔ fɛnw bɛɛ,
[36] k'a masɔrɔ Ala na Sion kisi ka Juda ka duguw jɔ. Aw denw bɛna u sigi yen, ka o dugukolo minɛ ka kɛ u ta ye.
[37] A ka baaradenw bɔnsɔnw na jamana sɔrɔ ka kɛ u ciyɛn ye. Minw bɛ a kanu, olu na sigi u ka yɔrɔ la.