[1] Dawuda ka Zaburu. Matigi, ne bɛ ne kalifa i la.
[2] Ne bɛ ne jigi da i kan, ne ka Ala, i kana sɔn ne ka maloya, ne juguw kanaɲagali ne kosɔn.
[3] Mɔgɔ minw jigi dalen bɛ i kan, olu si tɛna maloya. Olu tɛna maloya ka u kun biri, nka minw ye tilenbaliya kow kɛ ka muruti i ma, olu na maloya.
[4] Matigi, i ka i ka siraw jira ne la, ka ne kalan i ka siraw ko la.
[5] I ka ne bila i ka tiɲɛ sira kan ka ne kalan, katuguni i ye ne Kisibaa Ala de ye. Ne bɛ i makɔnɔ don o don.
[6] Matigi, i ka i hakili to i ka hinɛ ni i ka makari la, k'a masɔrɔ olu kɛra kabini fɔlɔfɔlɔ.
[7] E kana i hakili to ne kamalenma ka fililiw ni ne ka jurumuw la. Matigi, i ka i hakili to ne la i ka ɲumaya barika la, ani i ka ko ɲuman kɛlenw kosɔn.
[8] Matigi ka ɲi, a tilennen don, o de kosɔn a na jurumukɛlaw kalan a ka sira la.
[9] A na mɔgɔ sabalilen senw bila sira tilennen kan, ka u kalan a ka sira la.
[10] Matigi ka siraw bɛɛ ye makari ni kantigiya ye, a ka layidu ni a ka sariyaw marabaaw ye.
[11] Matigi, hali ni ne ka tilenbaliya ka bon, i ka o yafa i ka kanuya kosɔn.
[12] Matigi ɲɛsiranbaa ye jɔn ye? O tigi ka kan ka sira min ɲɛnatɔmɔ, Matigi na o jira a la.
[13] A daamulen na sigi hɛrɛ la, a bɔnsɔn na sigi dugukolo kan ka o kɛ u ciyɛn ye.
[14] Alaɲɛsiranbaaw na kɛ Matigi teriw ye. A ka layidu na u kalan.
[15] Neɲɛ jɔlen bɛ Matigi la tuma bɛɛ, k'a masɔrɔ a na ne sen bɔ jan na.
[16] I yɛlɛma ka ne fan filɛ ka hinɛ ne la, k'a masɔrɔ ne bɛ n'kelenna, neɲɛnilen don.
[17] Ne dusukun tɔɔrɔ kow bɛ caya ka ta'a fɛ. I ka ne tila ne sɛgɛn kow la.
[18] I ka ne kaɲɛni ni ne ka tɔɔrɔ filɛ ka ne ka jurumuw bɛɛ yafa ne ma.
[19] Ne juguw ka ca cogo min na, i ka o filɛ, u bɛ ne koniya kojugu.
[20] I ka ne ni mara ka ne kisi walisa ne kana maloya ka ne kun suuli, katuguni ne bɛ ne kalifa e de ma.
[21] Tilennenya ni dafalenya ka ne mara, k'a masɔrɔ ne ye ne jigi da i kan.
[22] Ala, i ka Israɛl kisi a degun kow bɛɛ ma.