[1] Dawuda ka tanuli dɔnkili. Ne ka Ala ni ne ka masakɛ, ne na barika da i ye. Ne na i tanu tuma bɛɛ badaa badaa.
[2] Ne na barika da i ye don o don, ka i tɔgɔ tanu tuma bɛɛ badaa badaa.
[3] Matigi ka bon, a ka kan ni tanuli ye, an tɛ se ka a bonya dɔn ka se a dan na.
[4] Bɔnsɔn dɔ na i ka kɛwalew ko fɔ bɔnsɔn wɛrɛ ye, u na i ka sebaaya ko kɛlenw lakali.
[5] Ne na miiri i nɔɔrɔba ni i ka saramaya la, ani i ka kɛwale kabakomaw.
[6] I ka sebaaya ko minw bɛ mɔgɔw lasiran, mɔgɔw na kuma olu ko la. Ne na i bonyaba kibaru fɔ.
[7] An na an hakili to i ka ko ɲuman kɛlenw na ka u welewele da, ka i ka tilennenya ko lakali niɲagali ye.
[8] Matigi ye makaritigi hinɛma ye, a tɛ dimin joona, a ka ɲumaya ka bon.
[9] Matigi ka ɲi mɔgɔw bɛɛ ma, a bɛ hinɛ a ka dafɛnw bɛɛ la.
[10] Matigi, i ka dafɛnw bɛɛ bɛ i bonya, i ka senumaw na i tanu.
[11] U na i ka masaya nɔɔrɔma ko fɔ, ka i ka sebaaya kow lakali,
[12] walisa u ka i ka sebaaya jira Hadamadenw na, ka i ka masaya sarama nɔɔrɔ bonya ko fɔ.
[13] I ka masaya bɛ to badaa, i ka kuntigiya bɛ se bɔnsɔnw bɛɛ ma.
[14] Minw bilen don, i bɛ olu dɛmɛ, ka mɔgɔ kurulenw bɛɛ latilen.
[15] Dafɛnw bɛɛ bɛ i makɔnɔ, i bɛ dumuni di u ma a waati la.
[16] I bɛ i bolo dayɛlɛ, ka fɛnɲɛnamaw bɛɛ wasa u sagona fɛnw na.
[17] Matigi tilennen bɛ a ka kɛwalew bɛɛ la, makaritigi don a ka kɛwalew bɛɛ la.
[18] Matigi ka surun a tɔgɔ welebaaw bɛɛ la, olu minw bɛɛ bɛ a tɔgɔ wele sɛbɛ la.
[19] A na a ɲɛsiranbaaw magoɲɛ fɛnw di u ma, a bɛ u kasikan mɛn ka u kisi.
[20] Matigi bɛ a kanubaaw bɛɛ mara, nka a na mɔgɔ juguw halaki.
[21] Ne da na Matigi tanuli welewele da. Dafɛnw bɛɛ ka a tɔgɔ senuma tanu tuma bɛɛ badaa badaa.