[1] Matigi, mun kosɔn i ye i mabɔ ne la, ka i dogo degun waatiw la?
[2] Mɔgɔ jugu kuncɛbaw bɛ tugu mɔgɔ tɔɔrɔlenw nɔ fɛ i ko tasuma. U b'a to olu ka minɛ u ka jan dalenw na,
[3] katuguni mɔgɔ jugu bɛ a yɛrɛ bonya a dusukun na. Binkannikɛla wasabali bɛ Matigi neni k'a fɔ ko: «Ne mago t'a la.»
[4] Mɔgɔ jugu kuncɛba b'a fɔ ko: «Ala tɛna foyi kɛ. Ala si tɛ yen.» A miiriliw bɛɛ filɛ o ye.
[5] A ka ko kɛtaw bɛɛ bɛɲɛ tuma bɛɛ. I ka kiri kow bɛɛ bɛ tɛmɛn a ni san cɛ. A bɛ a juguw bɛɛ mafiɲɛya.
[6] A b'a fɔ a yɛrɛ kɔnɔ ko: «Foyi tɛna ne lamaga, bɔnɛ tɛna ne sɔrɔ abada.»
[7] A da falen bɛ nenili ni nanbara ani fariya kow la. Juguya ni tilenbaliya dogolen bɛ a nɛn jukɔrɔ.
[8] A bɛ i merun dugu da fɛ ka mɔgɔ tilennen faga yɔrɔ dogolen na. A bɛɲɛnibaatɔ filɛ ni a ɲɛ ye.
[9] A bɛ i merun yɔrɔ dogolen na, i ko waraba bɛ i merun tu la cogo min na. A bɛ i merun ka bala faantan na. Ni faantan donna a ka jɔ la tuma min na, a b'a sama k'a minɛ.
[10] A bɛ i biri ka i ɲugu kaɲɛnibaatɔ minɛ ni a sɔnin ye.
[11] A b'a fɔ a yɛrɛ kɔnɔ ko: «Ala hakili t'a la. A y'a ɲɛw datugu, a tɛna a filɛ abada.»
[12] Matigi, i ka wuli. Ala, i bolo kɔrɔta. I kana ɲinɛ faantanw kɔ.
[13] Ala, mun kosɔn mɔgɔ jugu bɛ i mafiɲɛya? k'a fɔ a yɛrɛ kɔnɔ ko: «I tɛna ɲininkali kɛ o ko la.»
[14] Katuguni minw bɛ tɔɔrɔ ni degun na, i ɲɛ bɛ olu la, walisa i ka a sara ni i bolo ye. Ɲɛnibaatɔ bɛ a yɛrɛ kalifa i ma, i kɛra falatɔ dɛmɛbaa ye.
[15] I ka mɔgɔ jugu fanga tiɲɛn, i ka mɔgɔ juguw ka tilenbaliya kow nɔgɛn, walisa u nɔ si kana ye tun.
[16] Matigi ye Masakɛ ye badaa badaa, siyaw bɛɛ halakira ka bɔ a ka jamana la.
[17] Matigi, i bɛ mɔgɔ dɛsɛlenw mago dɔn, i bɛ u dusukun sabati, i bɛ i tulo majɔ ka u lamɛn,
[18] ka tiɲɛ di falatɔ ni mɔgɔ degunnen ma, walisa mɔgɔ min bɔra dugukolo la, o kana se ka u lasiran tun.