[1] Asaf ka dɔnkili. Ne ka siya, a' ye ne ka kalan lamɛn. A' ye aw tulo majɔ ne dala kumaw la.
[2] Ne na ne da yɛlɛ ka ntalen da, ne na waati tɛmɛnnen kuma kɔrɔmaw fɔ.
[3] An ye u mɛn ka u dɔn, an bɛnbaw ye u fɔ an ye.
[4] An tɛna u dogo u bɔnsɔnw na, an na Matigi tanuli kow fɔ bɔnsɔn nataw ye ka a ka sebaaya ni a ka kabakow lakali.
[5] A ye seereya to Yakuba cɛma ka sariya sigi Israɛl kan. A y'a fɔ an bɛnbaw ye, ko u ka u denw kalan nin ko kɔrɔw la,
[6] walisa bɔnsɔn nataw ka u dɔn. Den minw na bange, olu ka wuli ka u lakali u yɛrɛw denw ye,
[7] walisa u ka u jigi da Ala kan. U kana ɲinɛ Ala ka kɛwalew kɔ, nka u ka a ka ci fɔlenw mara.
[8] U kana kɛ u bɛnbaw bɔɲɔgɔnko ye, siya tulo gɛlɛn murutilen tun don. U ma u dusukun labɛn, u jigi dalen tun tɛ Ala kan.
[9] Kɛlɛkɛ fɛnw, kalaw ni biɲɛw tun bɛ Efrayim bɔnsɔn bolo, nka u bolila kɛlɛ don na.
[10] U ma Ala ka layidu mara, u ma sɔn ka a ka sariya sira taama.
[11] U ɲinɛna a ka kɛwalew kɔ ani a tun ye kabako minw jira u la.
[12] A tun ye o kabakow kɛ u bɛnbaw ɲɛ na Misira jamana la Zoan kungokolon kɔnɔ.
[13] A ye kɔgɔji cɛ tila fila ye k'a to u ka a cɛ tigɛ, a ye ji lawuli ka a tonɲɔgɔn kan.
[14] A tun bɛ u ɲɛ minɛ ni kabasen ye tile fɛ, ka taa u ɲɛ minɛ ni tasuma yeelen ye su fɛ.
[15] A ye farakurunw ci kungokolon kɔnɔ ka ji di u ma, i n'a fɔ o bɔra ji dunbaw la.
[16] A ye kɔw bɔ fara la ka woyo, a y'a to ji caman ka woyo i ko baji.
[17] Hali o, u tora ka a hakɛ ta ka muruti Kɔrɔtalenba ma jamana jalan na.
[18] U ye Ala kɔrɔbɔ u dusukun na, katuguni u ye u negela dumuni fɛn deli a fɛ.
[19] U ye kuma jugu fɔ Ala ma, u ko: «Ala bɛ se ka dumuni sigi mɔgɔw kɔrɔ kungokolon kɔnɔ wa?
[20] A filɛ, a ye farakurun gosi, ji bɔra o la ka woyo, kɔw fara fo ka kari, a bɛ se ka buuru fana di wa? Yala a na sogo sɔrɔ k'a di a ka mɔgɔw ma wa?»
[21] Matigi ye o mɛn minkɛ, a diminna, tasuma manana Yakuba kama, dimiya wulila Israɛl kama,
[22] katuguni u ma da Ala la, u ma u jigi da a ka kisili kan.
[23] O bɛɛ n'a ta a tun ye ci fɔ sankolow ye ka sankolo daw yɛlɛ.
[24] A ye manɛ jigin u kan i ko sanji k'a kɛ u balo ye, a ye sankololaɲɔ di u ma.
[25] Mɔgɔw ye mɛlɛkɛw balo fɛn dun, a ye dumuni fɛn di u ma fo ka u fa.
[26] A y'a to kɔrɔn fɛ fiɲɛ ka ci sankolow la, a ka sebaaya ye fiɲɛ ci ka bɔ worodugu yanfan fɛ.
[27] A ye sogo fana jigin k'a di u ma i ko sanji, a tun ka ca i ko buguri. Kɔnɔ kamanmaw tun don, u tun ka ca i ko kɔgɔji dala cɛncɛn.
[28] A ye olu bibi u cɛma u sigi yɔrɔ la ka u sigi yɔrɔ bɛɛ lamini.
[29] Ayiwa, u ye dumuni kɛ, fo ka u fa kosɛbɛ. A ye u negela fɛn di u ma.
[30] Sani ka u nata fa u negela fɛn na, ka u ka dumuni fɛn to u daw la,
[31] Ala ka dimiya wulila u kama ka u ka mɔgɔ barikamaw faga, ka Israɛl kamalenw gosi fo ka u bi.
[32] Halio, u tora ka jurumu kɛ Ala la, u ma da a ka kabakow la.
[33] O de y'a to a ye u si tilew tiɲɛn fɛn fufafu la, ka u si sanw tiɲɛn ni ja tigɛ kow ye.
[34] Ni saya sera u ma tuma min na, o tuma la u tun bɛ Ala ɲini, ka yɛlɛma a fan fɛ, ka kɔsegin a ma joona.
[35] U hakili jiginna a la ko Ala ye u ka farakurun ye, ko Ala kɔrɔtalenba ye u kunmabɔbaa ye.
[36] Nka u ye kuma nugulen fɔ a ye u da la, ka nkalon tigɛ a ye ni u nɛnkun ye.
[37] U dusukun sabatilen tun tɛ a ta fan fɛ, u ma kɛ kantigiw ye a ka layidu ko la.
[38] Nka ale ye makaritigi de ye, a ye u ka tilenbaliya yafa u ma, a ma u halaki. A ye a dusu bɔ mada ko caman, a ma a ka dimiya bɛɛ lamaga.
[39] A hakili tora a la ko u ye farisogo dama ye, fiɲɛ tɛmɛnta min tɛ kɔsegin tun.
[40] U murutira a ma kungokolon kɔnɔ ko caman, ka a dusu kasi ka u to jamana jalan na.
[41] U ma fara kɔrɔbɔli la, u tora ka Israɛl ka Senuma dimin kow kɛ.
[42] U ma u hakili to a ka sebaaya la. A ye u tila u la ɲinibaaw la don min na,
[43] ani a ye a ka taamashyɛnw kɛ Misira cogo min na, ka a ka kabakow kɛ Zoan kungo kɔnɔ, o bɛɛ bɔra u kɔnɔ.
[44] A ye u ka bajiw yɛlɛma ka kɛ joli ye, fo u ma se ka baji min.
[45] A ye dimɔgɔ kulubaw ci u ma fo ka u dun, ani ntoriw fo ka u halaki.
[46] A ye u ka sɛnɛ fɛnw di ntɔndenw ma, ka u bolo baara nɔ di ntɔnbaw ma.
[47] A ye u ka rezɛn sunw tiɲɛn ni sanbɛlɛ ye, ka u ka toro sunw tiɲɛn ni nɛnɛ ye.
[48] A y'a to u ka misiw ka faga sanbɛlɛ fɛ. U ka sagaw fagara sanpɛrɛnba fɛ.
[49] A ye a ka dimiyaba bi u kan, dusubɔ ni dimiya ani tɔɔrɔba, mɛlɛkɛkulu cilen tun don ka ko jugu kɛ u la.
[50] A ye sira dila a ka dimiya ye, a ma u niw kisi saya ma, nka a ye u niw to fiɲɛbana bolo.
[51] A ye Misira den fɔlɔw bɛɛ faga, olu tun ye u barika daminɛ ye Kam ka finiso kɔnɔ.
[52] Nka a ye a yɛrɛ ka mɔgɔw ɲɛ minɛ i n'a fɔ sagaw, ka u gɛn kungokolon kɔnɔ i ko sagakulu.
[53] A taara ni u ye hɛrɛ la, u ma siran, nka kɔgɔji ye u juguw datugu.
[54] A ye u lase a ka jamana senuma dancɛ la, nin kulu la, a yɛrɛ kininbolo tun ye o min sɔrɔ.
[55] A ye o siyaw gɛn ka bɔ u ɲɛ, ka u ka jamana tilatila u cɛ ka kɛ u ciyɛn ye. A ye Israɛl siyaw sigi olu ka finisow kɔnɔ.
[56] O bɛɛ n'a ta u ye Kɔrɔtalenba kɔrɔbɔ ka muruti a ma. U ma a ka ko fɔlenw mara.
[57] Nka u seginna kɔ fɛ ka janfali kɛ i ko u bɛnbaw, u jɛngɛna i ko kala dulen.
[58] U ye a dusu dimin ni u ka tintin sɔntaw ye, ka keleya don a la ni u ka ja dɛsɛnenw ye.
[59] Ala ye o ye tuma min na, a diminna, a ɲiginna Israɛl la kosɛbɛ.
[60] A ye Silo finiso bila k'a to yen, a tun ye o finiso sigi Hadamadenw cɛma.
[61] A ye o barika bila jɔnya la, ka o nɔɔrɔ don u juguw bolo.
[62] A ye a ka mɔgɔw di npan ma, a diminna a ka ciyɛnw kɔrɔ.
[63] Tasuma ye a ka kamalenw halaki, u ka npogotigiw furu ma siri.
[64] U ka sarakalasebaaw fagara npan fɛ, u ka muso cɛ salenw ma u su kasi.
[65] O tuma la Matigi kununna, i n'a fɔ a sunɔgɔlen tun don, i ko cɛ barikama min bɛ kulo diwɛn bolo.
[66] A ye a juguw gosi ka u lasegin kɔ fɛ. A ye u kɛ mafiɲɛyali fɛn ye badaa.
[67] A banna Yusufu ka so la fana, a ma Efrayim siyaɲɛnatɔmɔ.
[68] Nka a ye Juda siyaɲɛnatɔmɔ, Sion kulu kɔni, katuguni o ko tun ka di a ye.
[69] A ye a ka yɔrɔ senuma jɔ k'a kɛ i ko yɔrɔ kɔrɔtalenw, i ko dugukolo min sabatira a fɛ badaa.
[70] A ye a ka jɔnkɛ Dawuda fana ɲɛnatɔmɔ, k'a ta ka bɔ sagabonw kun na.
[71] A nana n'a ye ka bɔ saga denbaatigiw nɔ fɛ, walisa a ka kɛ a ka mɔgɔw Yakuba gɛnbaa ani a ka ciyɛn Israɛl gɛnbaa ye.
[72] Dawuda dusu jɛlen kɛra u marabaa ye, a ye u ɲɛ minɛ ni a bolo hakiliman ye.