[1] Dawuda ka Zaburu. Mɔgɔ min ka sariya tiɲɛnni kow yafara a ma, ni a ka jurumuw yafara a ma, o ye dubaden ye.
[2] Matigi tɛ mɔgɔ min ka tilenbaliya ko jate a kun, ani nanbara si tɛ mɔgɔ min dusu la, o ye dubaden ye.
[3] Ka ne makunnen to ne ka jurumu la, ne kolow jara. Ne ye tile bɛɛ kɛ ka nwunan.
[4] Katuguni i bolo digira ne la su fara tile kan. Ne barika banna o fɛ i ko tilema funteni. Sela.
[5] Ne ye ne ka jurumu fɔ i ye, ne ma ne ka tilenbaliya dogo i la. Ne ko: «Ne na ne jɔ ne ka sariya tiɲɛnni kow la Matigi ɲɛ kɔrɔ.» I ye ne ka jurumu yafa ne ma. Sela.
[6] O de kosɔn Alaɲɛsiranbaaw bɛ na i tɔgɔ wele ka i ɲini i ye tuma la. Hali ni jiba nana, o tɛna se u ma.
[7] I ye ne dogo yɔrɔ de ye, i ka ne kisi tɔɔrɔ ma. I ye ne lamini ni kisili min ye, ne bɛɲagali dɔnkili da o kosɔn.
[8] Matigi ko: «Ne na hakilitigiya di i ma. I ka kan ka sira min taama, ne na o jira i la. Ne na i kalan neɲɛsiran ko la, ka neɲɛ jɔlen to i kan.
[9] I kana kɛ hakilintan ye i ko so wala faliba, karafɛ ni juruw bɛ don u da la ka u minɛ walisa u ka kolo i ye.»
[10] Tɔɔrɔ caman bɛ mɔgɔ juguw makɔnɔ, nka mɔgɔ min jigi bɛ Matigi kan, makari na o tigi lamini.
[11] Mɔgɔ tilennenw, aw ka nisɔndiya Matigi la ka ɲagalikanba bɔ. Aw minw dusu tilennen bɛ, aw bɛɛ ka ɲagalikanba bɔ.